Lisobishini iwele eliqophe i-video
Basola abantu ngokuhlanekezela inkulumo yewele
INGCABHA isale newele elisabalalise i- video ngodaba obelusematheni ezinkundleni zokuxhumana, lukamakoti obekuthiwa ushade namadoda amabili angamawele akwaMnguni, eMtubatuba, akhonza ebandleni lamaNazaretha.
ILANGA lithole ukuthi bekuhleli isigcawu sabefundisi abakhulu, kudingidwa lolu daba eBuhleni izolo ngoLwesithathu.
ILANGA lithole ngoMfu Mbongwa Nzama - ongomunye wabefundisi abaphezulu kuleli bandla - ukuthi kabalibonanga icala abangalibeka umfundisi obeshadisa laba - uMfu Mthandeni Ntombela - ngoba akukho okuphambene nomthetho akwenzile njengoba nasemabhukwini ebandla kubhalwe ukuthi ushadise uMnu Zakhele Mnguni nowakwakhe, uNkk Amanda Mnguni, uMaGumede.
Iwele leli elinye elinguMnu Sakhile Mnguni, elisabalalise le video, belibaphelezela, kugcinwa usiko. “Kalikho futhi icala ebesingalibeka bona abebeshada ngoba akukho okuphambene nebandla abakwenzile ngokuba baganane.
"Sibe sesivumelana ngemuva kokuzwa zonke izinhlangothi ukuthi umuntu ophume esandleni nguSakhile ngokushutha le video egcine seyidida abantu kwangathi uthi lo mfazi ngowabo bobabili nomfowabo.
"Sibe sesijuba abefundisi babo ukuba bamfake endleleni ngokuba bamenze aqonde ukuthi yini ayifaka ezinkundleni zokuxhumana nokuthi yini okungafanele ayifake. Sibacele nokuthi bahambe bayozwa emndenini ukuthi lezi zindandatho abebefakana zona zithengwe ngubani, ngayiphi inhloso. Kuzothi uma abefundisi babo sebebuya nombiko ogcwele, mhlawumbe siqhubeke nodaba,” kusho uMfu Nzama.
Uthi okubajabulisile njengebandla, wukuthi abanikazi bodaba bebekhona, bephelezelwa nguyise osekhule ngendlela emangalisayo, bekushoda iwele elisabalalise i- video.
“Uyise kasizange simhlome imibuzo ngoba sibona iminyaka yakhe, kodwa into ayenzile kuthe uma sekukhulunyiwe, wasukuma wazibongela ukuthi udaba sigcine sikwazile ukuluxazulula ngendlela ngoba ubesehlala enexhala lokuthi uma efa, uzofa enecala uma lolu daba lungakaxazululwa,” kusho uMfu Nzama.
ILANGA likhulume nomyeni (Zakhele) izolo ngemuva kokuba bevele esigcawini sasebandleni, ocele ukuba kuthintwe abantu abakhulumela ibandla ngemibuzo eqondene nalo. ILANGA limbuza ngesimo sikamakoti njengoba kuke kwavela izindaba zokuthi akekho esimeni esihle selokhu kusabalele izindaba zokuthi ushade namadoda angamawele, uthe: “Akakabi sesimeni esihle, uyesaba ukuhamba emphakathini ngenxa yalezi zindaba ebezehlisa isithunzi sakhe engumuntu wesifazane futhi osemncane.
"Esikudinga kakhulu nomkami njengamanje, ukwelulekwa ngokommqondo ngoba isimo esidlule kusona sinzima kakhulu. Ngizama konke okusemandleni ukumsiza ukuba abuyele esimeni ngoba kuwumsebenzi wami njengendoda ukuba ngihlale ngimvikela.
"Okunye okungiphethe kabi wukuthi ubaba ongizalayo usekhulile, sengesaba ukuthi lolu daba lungaze lumnyusele ngoshukela. Kungangihlukumeza impilo yami yonke ukuthi ubaba adlule emhlabeni ngenxa yethu,” kusho uMnu Mnguni.
Ebuzwa ukuthi umfowabo wayeqonde ukuthini ngayekusho kwi- video, uthe: “Ngicabanga ukuthi wayejabule kakhulu ukuthi iwele lakhe selinenkosikazi futhi lishadelwe yintombi nto, eliyikhethe ebandleni. Ngabantu abaphendukezele inkulumo yakhe. Ngisho singaba ngamawele, kodwa ngeke size sidlele esitsheni esisodwa. Le nkulumo ayeyikhuluma icace bha uma usazi kahle isiZulu,” kusho uMnu Mnguni.