Isihluku kutholwa isikhulu sidindilizile enyuvesi
Kubonakale umlisa afike naye elayisha impahla emotweni kamufi
SIPHINDE sagutshazelwa yifu elimnyama isikhungo semfundo ephakeme, i-Durban University of Technology (DUT), kutholakala isidumbu sobefundisa obephinde asebenze njengomcebisi ezindabeni ezithinta izindawo zokuhlala ophikweni lwaseSteve Biko nolwaseWinterton.
Kushaqeke abaningi ngeSonto ekuseni kutholakala isidumbu sikaMnu Euvette Cardian Taylor (31), sidindilizile egunjili lakhe endaweni yokuhlala eseSteve Biko, eBerea, eThekwini.
Yize imibiko ibingakacaci kahle, kodwa ngokuthola kweLANGA, kusolakala umlisa othile okuthiwa ubesondelene nomufi, okuthiwa ufike naye kulesi sikhungo ngoMgqibelo, kuhanjwa ngemoto kamufi.
"Lo mlisa ubonakale sengathi uyazana naye (umufi), bangene endlini yakhe kukhona nabanye abangani bakhe (umufi). Bake baphuma baya kwesinye isitolo beyothenga izinto ezimnandi, babuya bayohlala kwaze kwahlwa,” kusho umthombo ohlala khona ophikweni lwaseSteve Biko.
Uthi kukhona abathi babone lo mlisa eselokhu ehla enyuka nezinto ezithile, okubalwa kuzona nomabonakude, eyozifaka emotweni kamufi. Uthi ababonile kabanakanga ngoba umufi nalo mlisa bebeke babonakala ndawonye, bazitshele ukuthi mhlawumbe uthunywe ngumufi ukuba ayofaka izimpahla emotweni.
Omunye umthombo osondelene nalesi simo, uthe abanye abebekho- na ngesikhathi umufi efika nalona wesilisa, basole ukuthi kungenzeka kube ngumuntu ahlekisana naye. Uthi izolo kube nomunye umngani kamufi ajwayele ukuya naye esontweni, othe uma emfonela wangamthola.
“Uphuthume endlini yakhe eyombheka, wafika kuvuleke isicabha umufi elele enqunu phezu kombhede. Endlini yakhe bekukhona izinto ezithathiwe kuvulwe isitofu se- gas, okusolwa ukuthi umsolwa ubefuna kushe kube sengathi ufe emlilweni,” kusho umthombo.
ILANGA liphinde lathola ukuthi imoto kamufi itholakale eMlazi. Ngokwe- website yalesi sikhungo, uDkt Taylor ungomunye wabantu abasha abebebhekwe ngabomvu ngokuba yikusasa le DUT njengoba kuthiwa uthole iziqu zeMaster’s kwi-Homeopathy.
Ngowezi-2013 ube ngowokuqala ngqa ukuhlomula ngomklolelo i-Abe Baily Award ohambisana nemifundaze ngenxa yamagalelo akhe kwezempilo. Lo klomelo kuthiwa unikwa abafundi bakuleli nabafundisa ezikhungweni eziphakeme, abasebancane.
Useke wathula umsebenzi wakhe ezingqungqutheleni ezahlukene eNingizimu Afrika naphesheya kwezilwandle, wathula nomqingo abewubhalile ngezempilo kwiWorld Summit on Social Accountability ngoMbasa (April), ngowezi-2017 eTunisia.
Kwenzeka lokhu nje lesi sikhungo sisemanzini ngemuva kokudlula emhlabeni kukaMlungisi Madonsela (20) waseJozini obenza unyaka wokugcina kwiBusiness Administration.
Lo mfundi kuthiwa udutshulwe ngomunye wonogada ngesikhathi kunesiteleka sabafundi kulesi sikhungo. Okhulumela amaphoyisa KwaZulu-Natal, uCol Thembeka Mbhele, ukuqinisekisile ukuthi kukhona icala elivuliwe, wathi basezithendeni zomsolwa.
Abakhulumela iDUT kuze kwashaya isikhathi sokuloba bengatholakali nemiqhafazo bengayiphenduli.