Zizoqina ezokuphepha eMkhosini woMthayi
Eyokweqiswa kwezimoto umngcele ifaka itwetwe enkosini
IDALA itwetwe enkosini yakwaTembe indaba yokwebiwa kwezimoto ezindaweni ezakhele KwaMhlabuyalingana, ziweliswe umngcele ohlukanisa iNingizimu Afrika neMozambique, njengoba iveze ukuthi kuqiniswe ezokuphepha eMkhosini woMthayi - owenziwa yisizwe sayo - mhla ka-23 kwephezulu esigodlweni senkosi, eMfihlweni, eManguzi.
Lokhu ikuveze ngeledlule esigcawini sabezindaba ebesihlelwe ngokuhlanganyela wubukhosi bakwaTembe, wuMasipala waKwaMhlabuyalingana neSimangaliso Wetland Park, ePalm Tree Lodge, eKosi Bay, kuyochazwa kabanzi ngoMkhosi woMthayi.
Lo mkhosi, owaziwa ngokuthi ngowamaganu, uzobe ugujwa okwesi-9 yisizwe sakwaTembe.
INkosi Mabhudu Tembe izwakalise ukungenami ngokukhuphuka kwesibalo sokuntshontshwa kwezimoto kusetshenziswe umngcele ongaphansi kweso layo kulo mhlaba ewubhekele iSilo.
Ithe isibalo sokwebiwa kwezimoto, kusukela ngo-2017 kade kuye uMnu Jacob Zuma kule ndawo ngesikhathi esengumengameli, sikhuphuke kakhulu saze safinyelela ku-500.
“Kasihleli nje sagoqa izandla mayelana nodaba lokuntshontshwa kwezimoto kuleli. Kusethuse kakhulu ukuzwa ukuthi isibalo sesikhuphukele ku-500. Salubeka udaba kuMnu Zuma ukuze ezosikhuzisa leli chilo, umthamo wenyuka kakhulu emuva kwalokho.
“Sikholwa wukuthi ukwebiwa kwezimoto akuhlelwa la emphakathini waseMkhanyakude, kepha kuhlelwa buqamama kunathi; eGoli, eThekwini naseCape Town. Thina saba neshwa lokuthi sisemngceleni lapho zidluliswa khona. Sizama ngokusemandleni ethu ukuxhumana nazo zonke izinhlaka zohulumeni bakuleli nangapha- ndle ukuzama ukuqhamuka nesixazululo,” kusho iNkosi Tembe.
Ikuqinisekisile ukuthi ezokuphepha kulo mkhosi wakulo nyaka zizoqiniswa kakhulu. Lokhu kufakazelwe yiMeya yaKwaMhlabuyalingana, uMnu Nkululeko Mthethwa.
“UMnyango wezokuPhepha koMphakathi kumasipala usuwaqalile amalungiselelo okuthi kuqashwe ngelokhozi ngaphakathi nangaphandle kulo mcimbi. Lokho kuzosiza ekutheni uma kukhona isimo esiphuthumayo esenzekayo, sihlale silindile ukuthi ngisho noma yisiphi isigameko, sisheshe silungiseke.
“Amasosha, amaphoyisa nezokuphepha zikamasipala, bazosebenza ngokubambisana kuphephe abantu bakithi,” kusho uMnu Mthethwa.
ISimangaliso Wetland Park sizobamba iqhaza elikhulu kulo mkhosi njengoba naso sifake isandla ngokwezinhlelo ezikhona.
UNkz Thandi Shabalala, osehhovisi lezokukhangisa eSimangaliso - obemele isikhulu esiphezulu saleli paki, uMnu uSibusiso Bukhosini - uthe bakubone kubalulekile nabo ukuba kube neqhaza abalibambayo kulo mkhosi, okuyinto eqalayo ukwenzeka selokhu kwathi nhlo.
“Ukungena komphathi wethu eSimangaliso, uMnu Bukhosini, kuze nolukhulu uguquko njengoba kukuningi akushintshile, sesibona nezinto eziningi ezinhle ezingakaze zenzeke phambilini. Kulo nyaka sizoba yingxenye ekuqinisekiseni ukuthi lo mcimbi uba yimpumelelo njengoba sazi ukuthi leli paki lisezingeni lomhlaba. Kuzosiza ukuthi sihehe izivakashi eziqhamuka kwamanye amazwe,” kusho uNkz uShabalala.