UGILE IZIMANGA KWI-PAY DAY FRIDAY
BAQENQELEZE phambili abomdlalo Isibaya emcimbini wokuqokwa kwalabo abazoncintisana emcimbini iSouth African Film and Television Awards (Saftas 13).
Lo mdlalo owuchungechunge oboniswa nsuku zonke kuMzansi Magic uqokelwe imikhakha engaphezulu kweyilishumi. Lo mcimbi ubungoLwesihlanu ebusuku eThe Zone eSter Kinekor eGoli. Emikhakheni eminingi Isibaya esiqhathwe kuyona besiqhathwe noZalo oluhamba phambili ngababukeli kanye, iRhythm City, iSithembiso neminye.
Yize noma le midlalo nayo iqokwe kaningana kodwa imikhakha yabo ikhale ngaphansi kweyalo mdlalo. Kweminye imikhakha efana noBest Actor TV Soap abalingisi balo mdlalo bazoqhudelana bodwa, uSdumo Mtshali odlala indawo kaSbu, noPallance Dladla, odlala indawo kaJabulani.
Abanye abalingisi balo mdlalo abaqhathwe ndawonye umkhakha weBest Supporting Actress TV Soap lapho kuqhathwe uGcina Mkhize (Khanyi), uThuli Thabethe ( Beauty Ngwenya) noLinda Sobezo (Lillian Nyandeni), bonke laba balingisa kulo mdlalo kanti akekho omunye abancintisana naye.
Zizobe zibhekene ngqo nomdlalo Uzalo njengoba emikhakheni eminingi laba beqhathwe bobabili.
KwiBest Actress kuzotholana phezulu uDawn Thandeka King, odlala indawo kaMaNgcobo emdlalweni Uzalo), uNomzamo Mbatha (odlala indawo kaThandeka Zungu kwiSibaya) noKgomotso Christopher yena odlala uYvonne Langa kwiScandal.
U-Dawn Thandeka King uqokwe kabili njengoba eqokwe emkhakheni wamaSoapie noweDrama njenge Best Actress emdlalweni iLock down.
I-The Queen neGenerations: The Legacy ababonwa nangokhasha.
Kuzokhumbuleka ukuthi abanikazi bale midlalo bawaduba la ma- awards.
Lo mcimbi uzoba ngenyanga ezayo (March) ngomhla ka-2 eSun City eSuperbowl. Imikhakha ekhona isiyonke iwu-92. IMbewu nayo iqokiwe emkhakheni owodwa, weMost Popular TV Soap/Telenovela yize noma izifikela nje.