Iyehlukana imibono ngekamengameli
Ukutholakala kwe-gas kuleli (eWestern Cape) kuzokwenza izwe liphume esimeni esincikiselayo
NJENGAMINYAKA yonke uma umengameli waseNingizimu Afrika ethula inkulumo yakhe ebhekiswe esizweni lapho kuvulwa iphalamende, abantu kabayi nganxanye kungemanzi.
KweyangoLwesine olwedlule iSona, eyethulwe nguMengameli Cyril Ramaphosa ( osesithombeni), kubonakale amaqembu aphikisayo ehleli elalele, kungekho kuxokozela obese kuvame ukwenzeka kobengumengameli phambilini, uMnu Jacob Zuma.
Nakulena kaMnu Ramaphosa - abeyethula okwesibili, kwazise neyangonyaka owedlule yethulwe nguyena emuva kokuchithwa kukaMnu Zuma ngoNhlolanja (February) kwesokuba ngumengameli - abantu abayanga nganxanye.
Okunye bakunanele kahle kanti kukhona nalapho bezwakalise khona ukungenami ngalokho abathi akakuthintanga kule nkulumo yakhe.
Osomabhizinisi abakhulu, yizinyunyana zezisebenzi, yizisebenzi, osopolitiki, abahlaziyi noquqaba oludla imbuya ngothi - bonke banemibono evumelanayo ngokunye, futhi iphikisane kokunye.
Kukhona abayetusile le nkulumo, kanti abanye bakhala ngokuthi bakhathele manje wukuba kuphele iminyaka ewu-25 bezwa cishe into efanayo lapho omengameli "abaqashwe" yiqembu elibusayi, i-ANC, benza iziphakamiso ezinhle nezethembiso ezingafezwa.
Umholi we-EFF, uMnu Julius Malema, uthe bekuyinkulumo yokukhankansela ukhetho oluzayo lena, kanti osomabhizinisi bona bayishayele ihlombe.
Kwelanamuhla sibheka kafushane izinto ezimbalwa ebiyehluke ngazo le nkulumo kulezo ezike zalalelwa kule minyaka ewu-10 edlule. Sizothinta kuphela lokho okubonakala kuyizinyathelo azozithatha ukulungisa umonakalo osuwenzekile, ezinye okukhona abevele eseqalile ukukwenza kulo nyaka wokuqala engenile kulesi sikhundla. Phakathi kwezinto azithintile, ezinye asebonisile ukuthi uzimisele ngempela ukuzilungisa, yizinkampani zikahulumeni okuhamba phambili kuzona i-Eskom. Uthe umonakalo okule nkampani usubeke lonke izwe esimeni esibucayi, esidinga ukuba kwenziwe okuthile ngokushesha ukusinqanda.
Kuleli phuzu umengameli umemezele ukuhlakazwa kwe-Eskom ibe yizigaba ezintathu: ukuphehlwa kukagesi, ukuwusabalalisa nokuwudlulisela emakhasimendeni.
I-National Union of Metalworkers of South Africa (Numsa), kayivumelani naleli qhinga, ikhala ngokuthi lizoholela ekudilizweni kwezisebenzi nokuthi ukuhlinzeka ngogesi kuwele ezandleni zabantu abazimele abazozicebisa bona. Baningi abasishayele izandla isimemezelo sikamengameli ngokuvulwa kophiko oluzofana noloFezela, oselwavalwa, futhi banethemba lokuthi lokho kuzoholela ekuboshweni kwabathintekayo ezenzweni zenkohlakalo.
UMnu Ramaphosa akazange agwegwese uma sekuza kuleli phuzu njengoba elimise ngesihloko elokuthi labo abazicebise ngezindlela zobumnyama, kumele bashushiswe futhi kulandwe ngokushesha konke abakuzuze kule nkohlakalo.
Wengeze nodaba lokuqashwa kuka-Adv Shamila Batohi, ekubeni yinhloko yophiko lwezokushushiswa komphakathi, ngolwasemzini okuthiwa yiNational Prosecuting Authority (NPA), njengomunye wemizamo yokubuyisa ukwethembeka nesithunzi ezinhlakeni ezifana nalolu phiko.
Abanye abaholi bezombusazwe bese bephelelwa yithemba ngenxa yokudlula kwesikhathi eside izwe liya ngokuya lizika esizibeni senkohlakalo, kodwa kungabi bikho olwenziwayo olunezithelo ezibonakalayo zokuyiqeda.
Abasenanele lesi nyathelo, bazwakalise ithemba lokuthi bonke labo amagama abo avelile ophenyweni lwekhomishini eholwa yiJaji Raymond Zondo, ephenya ngokuthunjwa kombuso ( state capture), kuzomele bashushiswe phela, kuthi uma amacala ebalahla, bavalelwe ejele.
Kuzokhunjulwa ukuthi lokhu kuvele emuva kwemibiko yokuputshuka kwencwadi ebhalwe ngokuhlanganyela ngamanxusa amele amazwe awu-5 - uhwebo lwawo neNingizimu Afrika olulinganiselwa ku-75% - okuyi-USA, yiUnited Kingdom, yiNetherlands, yiGermany neSwitzerland.
La manxusa abezwakalisa ukukhathazeka ngobugebengu nenkohlakalo kuleli. Athe uma uMnu Ramaphosa engenzi lutho ngabantu abathinteka enkohlakalweni okukhulunywa ngayo kwikhomishi ephenya ngokuthunjwa kombuso, lokho kungadunga izinto, kwenze abatshalimali bakwamanye amazwe babe mathintanyawo ukukhathula indima yezomnotho kuleli. Njengoba bekulindelekile, kalusalanga udaba olushisayo nolubucayi lokudliwa komhlaba ngaphandle kwesinxephezelo.
UMengameli Ramaphosa ubikele indlu ngosekwenziwe ngalolu daba, ebonga ithimba longoti eliholwa nguDkt Vuyo Mahlathi, elisungulelwe ukweluleka uhulumeni ngoguquko lobunikazi bomhlaba okulindeleke ukuba lethule umbiko walo ngoNdasa (March). Okunye okungafaniswa nokunyelwa yinyoni esandleni, yisimemezelo ngokutholakala kwe- gas nowoyela engxenyeni yolwandle engaphansi kweNingizimu Afrika, ebizwa nge-Outeniqua Basin, eWestern Cape, okubonwa ngongoti njengento ezonika iNingizimu Afrika okuningi okuhle, ikakhulukazi kwezamandla lapho izwe lizoke liphume esimeni esincikiselayo. Okunye okungasalanga ohlwini lwezethembiso, kwazise kuza ukhetho lukazwelonke nezifundazwe, uMengameli Ramaphosa uthinte udaba lomshuwalense wokwelashwa wesizwe, obizwa ngeNational Health Insurance, nokho okungakacaci ukuthi imali yawo izotholakala kuphi.
Nokho kuzokhumbuleka ukuthi kunabaholi be-ANC asebeke bakhuluma indaba yokuthi le mali iyothathwa njengentela - okungaziwa ukuthi njengoba izinhlaka eziphatha imali ziphenduka ibhodwe loju ezikhulwini zikahulumeni, kuyogwenywa kanjani ukuba zingayisavuni eyalo mshwalense.