OwaseKZN uqokelwe esikwatini se-IAAF
Nguyena kuphela odabuka kulesi sifundazwe
INJABULO umsubathi waKwaZulu-Natal, uJenet Mbhele, eqokelwa eqenjini lesizwe eliya kwi-International Association of Athletics Federation (IAAF) World Cross Country Championships azokuba ngomhla ka-30 kuNdasa (March) e-Aarhus, eDenmark.
UJenet nguyena kuphela odabuka KwaZulu Natal oqokelwe kulesi sikwati emuva kokwenza kahle kwiCross Country Trials ngenyanga edlule eFree State.
Ungene unombolo 3 esigabeni esivulelekile kwabesifazane emjahweni onqontshwe nguKesa Molotsane.
UJenet wenza kahle kwabesifazane esifundazweni njengoba ngonyaka odlule ubemele izwe kwi-IAAF World Half Marathon eSpain.
Imenenja-Jikelele yeKwaZulu- Natal Athletics (KZNA) uGoodman Cele utshele ILANGA ukuthi ujabule ngokuqokwa kwalo msubathi eqenjini lesizwe.
“SiyiKZNA kuye kuthi uma kukhona umsubathi wesifundazwe oyomela izwe kube khona esimenzela khona. Nalapha sisazohlangana ukubona ukuthi yini esingase simenzele yona njengoba senzile nanyakenye eya kwiWorld Half Marathon.
“Yize kuyisikwati sesikhashana kangingabazi ukuthi uzongena eqenjini lokugcina njengoba engene unombolo 3 kwi-ASA Cross Country Trials. Nasemijahweni yesifundazwe wenza izimanga njengoba eyinqoba cishe yonke imijaho abamba iqhaza kuyo,” kubeka uNdosi
I-ASA itshele abezindaba ukuthi kuzokuthi maduze ikhiphe iqembu lokugcina eliya eDenmark kanti leli qembu ngeke lishintshe kakhulu. Kulo mqhudelwano kuzokube kuncintiswana kumaJuniya nabesigaba esivulelekile kuphela. Amajuniya enza i-8km bese kuthi abesigaba esivulelekile benze i-10km.
Selilonke iqembu eliqokwe ukumela iNingizimu Afrika kule midlalo limi kanje, esigabeni esivulelekile kwabesilisa: UPrecious Mashele, uRantso Mokopane, uPakiso Mthembu, uRhyn Mphahlele, uKabelo Seboko, uThabang Mosiako noPuseletso Mofokeng.
KumaJuniya: uRealebogo Seopensengwe, uMaxine Chaumeton, uRobert de Lephotho, uJoshua Pholoana noNgconde Matwebu.
Kwabesifazane: NguJenet Mbhele, uKesa Molotsane, uDominique Scott, u-Aynslee van Graan noGlenrose Xaba.
Kumajuniya: NguCarmie Prinsloo, uGene Coetzee, uDaniele Verster, uCara du Preez, uPrudence Sekgodiso noNicole Louw.