IPMB Utd imanqika ukusayina uSangweni

Ikhala ngezindleko zeholo lakhe

IMARITZBURG United icabanga kaningi ngokusayinisa umdlali okhonjwe indlela yiChippa United izeseka ngokuthi inciphisa izindleko ngoba ubehola kakhulu.

IMaritzburg ijabulise abalandeli bayo iguqisa ngo-3-1 iPolokwane City kowe-Absa Premiership ngoLwesihlanu kusihlwa eHarry Gwala Stadium, eMgungundlovu.

IMaritzburg iye kulo mdlalo idonsa kanzima njengoba bese kuphele izinyanga ezine ingakaze inqobe.

Isiyoze ibuyele ensimini mhla ka-24 kwephezulu lapho izobhekana khona neCape Town City eCape Town Stadium.

Leli phephandaba libike ukuthi le kilabhu ihlola uThamsanqa Sangweni obelihlikihla esiswini kwiChippa.

Emuva kwale wini leli phephandaba lithole ukuthi le kilabhu icabanga kaningi ngokusayinisa lo mdlali.

U-Eric Tinkler ololonga iMaritzburg ebuzwa ukuthi ngabe usenqumile yini ngoSangweni uthe: "Siyazi ukuthi yini uSangweni akwazi ukuyenza kodwa kuzofanele azibonakalise.

"Ngingumlandeli wakhe kodwa uke walandelwa yifu elimnyama ebholeni yingakho kufanele ngimuhlolisise.

"Usazojima nathi izinsuku ezi- mbalwa bese sinquma,” kusho uTinkler.

Uthi le wini isuse umthwalo obusemahlombe kubona.

“Silisusile igorilla ebelihleli emahlombe ethu kodwa kusasele inkawu.

"Nginethemba lokuthi kwayona sizoyisusa.

"Le wini isisize kakhulu yabuye yavova imiqondo yabadlali bethu ngoba kade bayigcina.

"Bengibanike ikhefu lezinsuku ezimbili ukuba bayophumula ke bakhohlwe nje yibhola benze izinto zabo.

"NgoMsombuluko (namuhla) siqala amalungiselelo omdlalo weCity nawo ongeke ube lula,” kusho uTinkler.