BATHEMBISA UKUQEDA NGE-ORLANDO PIRATES
IZALELWE yinja endlini i-Orlando Pirates njengoba kuvela ukuthi iqembu ezobhekana nalo koweCaf Champions League lisonga ukuyenza isilo sengubo.
IBucs izobhekana ne-Esperance yaseTunisia koka-group B koweChampions League kusasa ngoLwesibili ngo-15h00 kulo leliya lizwe.
La makilabhu ashayane aze abukana kuba ngu-1-1 emdlalweni obuse-Orlando Stadium, eSoweto, emasontweni amabili edlule.
IBucs iyona eqhwakele kuleli qoqo, ilandelwe iyona le kilabhu yaseTunisia.
Nokho womabili la makilabhu anamaphuzu amahlanu emidlalweni emithathu.
Leli phephandaba lithole ukuthi le kilabhu yaseTunisia isonga ngokuyenza isilo sengubo iBucs kulo mdlalo. Kuthiwa nabalandeli bayo bathembisa ukuyihlukumeza ngoba abafuni ihambe nephuzu.
UBen Motswari odlala esiswini kwiBucs uthi bayazi vele ukuthi babhekene nobunzima kule kilabhu.
“Siyazi ukuthi ithandwa kanjani ezweni layo, abalandeli bayo bagila imikhuba uma idlala.
"Kodwa-ke sizilindele zonke lezo zimo ngoba besazi singena kulo mqhudelwano ukuthi sizobhekana nazo.
"Kuzofanele luqine ngempela ukhakhayi uma sifuna ukunqoba lo mdlalo singabheki ezinye izinto ezenzeka eceleni sibhekane nawo ngqo. Singabuya nokuthile kulo mdlalo yize kona kuzokuba nzima,” kusho uMotswari.
Komunye umdlalo weChampions League, iMamelodi Sundowns izobhekana ne-ASEC Mimosa yaseIvory Coast koka-group A kusasa ngoLwesibili ngo-18h00 kulo leliya lizwe.
Emlenzeni wokuqala iDowns inenebule ngo-3-1 leli qembu emdlalweni obuseLoftus Stadium, ePitoli emasontweni amabili edlule.