Uveza ikhambi lakhe unozinti woSuthu
Uthu uyawubhekela umsamo wakhe
UVEZA ikhambi okuyilona elenza abukeke ephumelela unozinti wamaZulu FC aguqise iCape Town City ngo-1-0 kowe-Absa Premiership ngoMgqibelo kusihlwa eKing Zwelithini Stadium, eMlazi.
Igoli okunqobe ngalo uSuthu libekwe enethini nguThapelo Nyondo odlala emuva.
USiyabonga “Nqaba” Mbatha ovimbela uSuthu ugile izimanga kulo mdlalo enqaba ukuthi iCity ibhakuzise inethi lakhe.
ICity ithole iphenathi umdlalo usanda kuqala yashaywa nguKermit Erasmus wayivimba uMbatha.
Selokhu ejoyine uSuthu ayikamgeneli iphenathi womathathu abebhekene nawo uwavimbe wonke.
UMbatha uqokwe njengomdlali ovelele kulo mdlalo weCity.
Sekungokwesibili kulandelana ehamba nalo mklomelo njengoba nasemdlalweni abahlule kuwona iMamelodi Sundowns ngo-2-0 ePitoli ewunqobile.
Lo mdlali exoxa naleli phephandaba izolo ngeSonto ekuseni uveze ikhambi athi yilona elimsebenzelayo ukuze izinto zakhe zihlale zikhanya.
“Into engisiza kakhulu ukuze izinto zami zihlezi zikhanya wukuthi ngiyawabonga amadlozi akithi angiwakhohlwa nangengozi ngoba yiwona engikholwa wukuthi angibhekile futhi angilethela okuhle.
Kwakusasa (namuhla ngoMsombuluko) kukhona engikwenzayo ngoba ngiyakholelwa ezintweni zesintu,” kusho uMbatha.
Uthi bebazi ukuthi bazoyihlula iCity ngoba bese beyifunde kahle lapho ibuthaka khona.
“Besazi ukuthi uma sithole igoli kuqala bazodideka baphithanelwe ngamakhanda.
"Ukuvimba kwami iphenathi kwenze amajita afaka umfutho kakhulu kunakuqala.
"Sijabule ngalo mphumela wenza singabi navalo lokugencwa yizembe,” kusho uMbatha.
Lo mdlali kubhekwe ngabomvu ukuthi yisiphi isizathu esingenza angabizwa eqenjini lesizwe iBafana Bafana elizodlala owokuhlungela ukungena kwi-Afcon neLibya ngomhla ka-22 kuNdasa (March) ekuhambeni.
UMbatha usendaweni yesibili konozinti bakuleli ngokuqeda umdlalo engangenelwanga goli.
Kuqala uDarren Keet weBidvest Wits ongangenelwanga goli izikhathi ezingu-9 emidlalweni engu-20.
Kube nguMbatha ongangenelwanga goli emidlalweni engu-8 kwengu-14 ayiqalile. Bese kweyesithathu kube nguRonwen Williams weSuperSport United yena emidlalweni engu-19 ayiqalile akangangenelwa goli emidlalweni engu-7.
Amarekhodi nangendlela adlala ngayo uMbatha kukhomba ukuthi ukufanele ukungena egijima kwiBafana Bafana uma kungukuthi kubhekwa ifomu uma umdlali ebizwa.
Vele kunesikhala konozinti njengoba u-Itumeleng Khune weKaizer Chiefs elimele.
Isiyonke imiphumela ye-Absa Premiership ihambe kanje:- Baroka FC 2, Celtic 2; Arrows 2, SuperSport 3; AmaZulu FC 1, CPT City 0; Free State 0, Chippa 2; Highlands 2, Wits 1; Chiefs 1, Pirates 1; Maritzburg 3, Polokwane 1.