WESULE ISIGUBHUKANE UMQEQESHI
USULE isigubhukane umqeqeshi woMvoti FC ezovovana inkani neKwaDukuza FC koweSouth African Football Association (Safa) KZN ABC Motsepe League ngoLwesithathu ngo-15h00, eKing Edward, eGreytown.
ILANGA lihoshe ngemithombo yalo engashayi eceleni ukuthi ligqabukile igoda phakathi kukaKabelo “KB” Sibiya noMvoti FC ngezizathu ezingacacanga.
Kuthiwa uSibiya uhambe ewumuntu ocele ukuyobheka isimo ekhaya ethi kukhona ogulayo.
Kuthiwa uhambe unomphelo njengoba engabange esabuya.
Kuvela ukuthi ubehubhuza amanga nje ubevele efuna ukuhamba.
UBonginhlanhla Gwala ongumnikazi woMvoti FC uvumile uku- thi uSibiya uhambile.
Uthi baphoxekile ngoba bebesabheke lukhulu kuyena.
“Njengamanje akekho umuntu esizomqasha, kuzoqhubeka u-Alex Zondi obengumsizi wakhe.
Bengivele nginaye eqenjini uZondi ngikholwa wukuthi uzoqhubeka ngaphandle kwezinkinga nekilabhu. Ngiyazi ukuthi uyezwana nabadlali, bazoqhubeka nokusebenza,” kusho uGwala.
Kuzo ezeMotsepe League, i-Ashley United iqumbe phansi iMaritzburg City ngo-1-0 wegoli likaMalwande “Serero” Baloni ngoMgqibelo ntambama eMpumalanga Stadium.
I-Durban FC yona ixebule iNatal United ngo-2-0 wamagoli kaThalente “Sticks” Mbatha nelikaPhilani Gwala eKing Zwelithini Stadium.
Kuzo ezakulesi sigaba kuli- ndeleke ukuba iGWP Friends icaphune amaphuzu angu-9 emacaleni azoqedwa ukuthethwa kusasa ngoLwesibili eMgungundlovu.
Imiphumela yemidlalo yeSafa KZN ABC Motsepe League ihambe kanje:- Durban FC 2 , Natal 0; Pmb City 0, Ashley 1;
Imidlalo yeSafa KZN ABC Motsepe League ngoLwesithathu iqhathwe kanje:
KwaNdengezi: Ashley United vs Maritzburg City 15h00.
EMhlathuze Complex: Milford FC vs Ladysmith United 15h00.
EKing Edward: UMvoti FC vs KwaDukuza FC 15h00.
EMzisho: Natal United vs Happy Wanderers 15h00.
E-Eastbury Ground: Rainham Sporting vs GWP Friends 15h00.
EChatsworth: Summerfield Dynamos vs Edendale Juventus 15h00.