IFUNA UKUQHUBEKA NOMGQIGQO I-EAGLES
KABAZIMISELE ukusuka emgqigqweni abakuwona abadlali beRoyal Eagles ebhudluze i-University of Pretoria ngo-50 ovuthayo koweNational First Division (NFD) ngoMgqibelo ntambama eChatsworth Stadium, eThekwini.
Amagoli e-Eagles ashaywe ngo-Andile Fikizolo amabili uDiego Brown, uPhilani Cele nelikaDillan Solomons.
USolomons ekhuluma naleli phephandaba izolo ngeSonto uthi leli khefu lamasonto amabili ngenxa yemidlalo yeNedbank Cup ngeke nangengozi libaphazamise emgqigqweni wabo kunalokho bazobuya kungathi bathelwe ngezibonkolo. Uthi into ebasebenzelayo wukuthi babambisene nethimba labaqeqeshi.
“Njengoba singenawo umdlalo ngempelasonto ngenxa yokuthi siphumile kwiNedbank Cup sizimisele ngokusebenzisa leli thuba ukuzicijisisa lapho esibuthuntu khona.
"Sizimisele ngokuyifaka kwiPremiership le kilabhu, lokho sizokulwela.
"Umdlalo weTuks ubungelula yikhona nje ukuthi besizinikele.
"Abantu bazobona amagoli amaningi esiwashayile bese becabanga ukuthi besizigwazela ibhece kanti akunjalo siwajulukele,” kusho uSolomons.
Isiyonke imiphumela yeNFD:- Ajax 4, TTM 4; Bay FC 2, Cape Umoya 1; Galaxy 1, Kings 0; Sporting 2, Maccabi 2; Ubuntu 2, Cosmos 1; Mbombela 0, Stellenbosch 0; Spurs 1, UThongathi 1, Eagles 5, Tuks 0.