Ungase ubhuntshe umshado ngombango wamalobolo
Umndeni ukhale ngokuthi ezinye izinkomo okulotsholwe ngazo, zingamankonyane
SEKUQUBUKE ukungaboni ngasolinye phakathi kwemindeni yezingane okulindeleke ukuba zibophe ifindo likasofasilahlane mhla ka-27 kwephezulu, uSiyacela Dlamuka wasoNdini noThando Msomi waseNkandla, abaneminyaka ewu-16 ubudala.
USiyacela noThando bathembisana umshado ngasekupheleni konyaka odlule, kanti umshado wabo ubhekwe ngabomvu njengoba bebuye babonakale ohlelweni oluthi "Isencane Lengane" kuMoja Love, ku- channel 157 kwiDStv.
Imithombo yeLANGA esondelene nemindeni yalezi zingane, ipotshoze ukuthi ungase ubhuntshe lo mshado njengoba abakubo kamakoti, bekhala ngokuthi ezinye izinkomo okulotsholwe ngazo zingamankonyane.
Ngaphandle kwalokho, imithombo yeLANGA ithe unina kamakoti, uNkz Ntombika Msomi, ubhekene ngeziqu zamehlo noninalume okwalotsholwa kubona indodakazi yakhe, ufuna kube nemali yelobolo ayitholayo.
ILANGA like labika kabanzi ngodaba lwalezi zingane lapho uyise kaSiyacela, uMfu Mthandeni Dlamuka, elitshele ukuthi indodana yakhe, imtshele ezimpempeni ukuthi uma engavumi ukuba iqale amalungiselelo okushada nesinqandamathe sayo, izovele izibulale.
Umthombo okhulume naleli phephandaba, uthe: “Amanye amalungu omndeni (wakwaMsomi) aseke amtshela uDlamuka ukuthi uma engasilungisi lesi simo sezinkomo, ngeke ubekhona umshado.
"Afuna okungenani azilande lezi zinkomo azilethe ziyimali ngoba unina kaThando, ukhala ngokuthi nabo njengomndeni, bayadinga ukuhlaba, kodwa ngeke bakwazi ukuhlaba amathole, okungenani mabamnike imali,” kusho lo mthombo.
UMnu P. M. Msomi - owalile namagama akhe aphelele - onguninalume kanina kamakoti, utshele leli phephandaba ukuthi ikhona inkinga ngezindaba zezinkomo ezimbili, okuthiwa zilethwe ngabakwaDlamuka.
“Njengomndeni, sikhulumile nabakwaDlamuka ukuba bake balungise lesi simo. Mina ukube bekuyingane yami nje, beyingeke ishade lesi simo singalungiswanga. Kumele kube nguyena unina wengane namalungu omndeni abazothatha isinqumo ukuthi benze njani,” kusho uMnu Msomi.
Utshele leli phephandaba ukuthi yena wayevele engahambisani nokuba kulotsholwe uThando ebe esemncane kangaka, kodwa ngoba kakuyona indodakazi yakhe, naye
akakwazi ukukhuluma kakhulu.
"Ngambuza ukuthi ujaheni emncane kangaka esefuna ukugana, wathi ubona ukuthi usethole umaqondana, ngabona ukuthi uma ngivimba, ngizobe sengiqhatha umndeni. Ukuthi umshado uyaqhubeka noma kawuqhubeki, nalokho kakukho ezandleni zami.
"Imibiko yokuthi sibanga ilobolo kayilona nakancane iqiniso. Isimo esikhona yilesi sezinkomo futhi sengikhulumile noDlamuka ukuba asheshe asilungise ngaphambi kokufika kosuku lomshado,” kusho uMnu Msomi.
UMfu Dlamuka utshele leli phephandaba ukuthi ngokwabo, konke sekumi ngomumo futhi njengamanje umatasa ufunela umakoti wakwakhe isikole ukuze aqhubeke nemfundo.
Njengoba ebeziqhenya ngokuthi laba bagadiwe ukuthi bangayi ocansini, uthe uma sebeshadile njengoba esebakhele nendlu yabo nje, ngeke bayingene eyokuthi benzenjani ngoba izobe ingasafuni yena.
UThando engxoxweni abe nayo naleli phephandaba ngenyanga edlule, uthe ufisa ukwenza izifundo zokuba ngusonhlalakahle (Social Worker), uma eseqede isikole.
Lezi zithandani njengamanje zenza uGrade 10.
UNkz Sithembile Msomi, ongunina omdala kaThando, othe nguye okhulumela unina kamakoti - uthe kakulona iqiniso ukuthi kunombango welobolo, kodwa isikhalo sikanina kamakoti wukuthi izinkomo ezine kweziwu-6 zoboya, zincane kakhulu.
Isazi sezomthetho, u-Adv Lucky Nhlabathi, sithe umthetho waseNingizimu Afrika uyavuma ukuba ingane eneminyaka engaphansi kuka-18 ishade. “Lokhu kwenzeka noma kuvumeleke kuphela uma abazali bezingane lezo ezithintekayo bevuma nabo,” kusho yena.
Nomndeni uyadinga ukuhlaba, hhayi nje amathole.