UTHI WAYALELWA UKUBA AYEKE UPHENYO
OWABE eyinhloko yophiko loKlebe KwaZulu-Natal, uMnu Johan Booysen, uthi uMmamonnye Ngobeni, owabe engukhomishana wamaphoyisa kulesi sifundazwe, wamyalela ukuba ayeke ukuphenya usomabhizinisi waseThekwini, uMnu Thoshan Panday.
Lokhu ukuveze izolo ngoLwesithathu kwikhomishini ephenya ngokuthunjwa kombuso ( state capture) eholwa yiJaji Raymond Zondo.
Uthe lona kwakuwumyalelo “ongekho emthethweni”.
Kuthiwa uMnu Panday wakhipha isamba semali elinganiselwa ku-R30 000 wokwenzela umyeni kaMmamonnye Ngobeni idili lomkhosi wokuzalwa kwakhe.
Kuthiwa lo somabhizinisi onokuxhumana noMnu Jacob Zuma, wenzelelwa ukuze athole inkontileka yezindawo zokuhlalisa amaphoyisa ngesikhathi semidlalo yeNdebe yoMhlaba yeFifa ngo2010, eyayidlalelwa kuleli.
Kuthiwa wenyusa intengo kangangoba wathola isizumbulu esilinganiselwa ku-R60 million.
UBooysen uthe wathintwa nguBrig. Lawrence Kemp, owayeyinhloko yesifundazwe yophiko olusingethe imali, owaveza ukuthi kwakusolisa sengathi kunokungalandelwa komthetho ekuhlinzekeni ngeminye imisebenzi emnyangweni wamaphoyisa.
Emuva kokuba abaphenyi sebejutshiwe, uBooysen uthi wathola ucingo luvela kuNgobeni (uMmamonnye) ebuza ukuthi uphenyo lwabe lumayelana nani.
“Wayalela ukuba ngiluyeke uphenyo. Wayenelungelo lokunginikeza imiyalelo, kodwa hhayi ukuthi ngiyeke uphenyo. Lokho, ngokubona kwami, kwabe kuwumyalelo ongekho emthethweni,” kusho uBooysen.
Uthi wathobela lowo myalelo kodwa “ngangingeke ngiluyeke uphenyo”.
Uthi wathola olunye ucingo luvela kuNgobeni, mhla ka-8 kuNhlaba (May) 2010.
“Wayecasukile kakhulu futhi engithethisa. Wathi kimi, ‘Nginitshelile nina ukuba niluyeke uphenyo’. Ngazama ukumbonisa ukuthi uphenyo lwase luyekiwe‚” kusho uBooysen.