KUQALILE UKUFUNDA EGUGULESIZWE
KUSIZE ukungenelela koMnyango wezeMfundo KwaZuluNatal ukuze kudambe isimo eGugulesizwe High, eMandawe, eScottburgh njengoba abazali babafundi bebebhikisha bevale isikole cishe lonke isonto eledlule.
Abazali bavale amasango esikole befuna kugcwaliswe izikhala zothisha abangekho kulesi sikole, okubalwa kubo uthishanhloko, yisekela lakhe nenye yezinhloko zezifundo.
Kuthiwa sekuphele isikhathi esingangonyaka zingavaliwe lezi zikhala.
Kuzokhumbuleka ukuthi ILANGA libike ngoMsombuluko ngalolu daba, lapho kuvele ukuthi abazali bavutha bengabaselwe ngezinkinga ezikhungethe lesi sikole.
Ukufunda kuthiwa kuqale kahle ngoMsombuluko emuva komhlangano okuthiwa ube ngeSonto lapho izikhulu zomnyango zithembise khona ukuthi umnyango uzongenelela ekulungiseni izinkinga - yize-ke bekukhalwa ngokuthi kade kwasa zibikwa kubahloli bawo kodwa bezindela ukuzilungisa.
Umthombo waleli phephandaba uthe: “Into ecike abazali baze bathathe isinqumo sokuvala amasango esikole, wukuthi bese bekhathele yizinkinga nodaba lwalabo thisha lungathathelwa phezulu ekubeni isigungu esilawula isikole sesilubikele kaningi ihhovisi labahloli ngezinkinga zasesikoleni kodwa kungathathwa zinyathelo”.
Usihlalo wesigungu esilawula isikole, uMnu Aaron Jeza, uthi kuyiqiniso ukuthi ukufunda kuqhubeka njengenjwayelo esikoleni.
“Yize ingekho into ecacayo okwamanje ukuthi izinkinga zizoxazululwa kanjani, kodwa siyethemba ukuthi zizoxazululeka maduzane ukuze kungeke kube nokuphazamiseka kokufunda futhi esikoleni,” kusho uMnu Jeza.
Okhulumela uMnyango wezeMfundo, uMnu Muzi Mahlambi, uthi ukufunda kuyaqhubeka esikoleni kanti umnyango uthumele izikhulu zawo ukuba zingenelele.
“Siyabonga ukuthi amalungu omphakathi akhuzwe akhuzeka ngokuphazamisa ukufunda eGugulesizwe. Sicela ukuba imiphakathi ihlukane nokuphazamisa ukufunda ezikoleni ngoba lokhu kwenza ukuthi abafundi basalele ngemuva ezifundweni zabo,” kusho uMnu Mahlambi.