Umasipala uhlomulise umphakathi ngogandaganda
Uzothenga namaloli awu-20 okuthutha amanzi ukusiza umphakathi
AZOHLEHLISWA amakhansela ohlelweni lokuqashwa kwamalungu omphakathi ngaphansi kukaMasipala wesiFunda iZululand, ngenxa yezikhalo zokuthi ahlomulisa izihlobo zawo.
Lokhu kuvezwe yiMeya yaseZululand, uMfu Thulasizwe Buthelezi ngoLwesibili, eDumbe ngesikhathi ethula ogandaganda abawu-10 abathengelwe umphakathi ukuze ulime.
UMfu Buthelezi uthe izinhlelo zokuqasha emawadini bazozibambela mathupha bewumasipala, ukuze kuzohlomula abantu abahlwempu ohlelweni lwemisebenzi emincane okubhekelelwa ngayo amalungu omphakathi.
"Sizoqasha abantu abawu-7 iwadi ngayinye kulo nyakamali. Abantu bebethola imali yesibonelelo engango-R2 600 ngenyanga ngoba besifuna baphilise imindeni yabo, kodwa-ke kukhalwe kakhulu ngamakhansela ukuthi uhlelo kawaluhambisi ngobulungiswa.
"Umasipala wethu unamawadi awu-90, sesizosebenzisa uhlelo lokuzibambela emisebenzini okumele ihlomulise umphakathi,” kusho uMnu Buthelezi.
Uthe bewumasipala banqume ukuthenga ogandaganda ngoba bafuna abafelokazi, izintandane nabakhonze ukulima, bakwazi ukuziphilisa ngomhlabathi.
Uphinde wanikeza umphakathi izimbewu nomanyolo.
Uveze nokuthi kwisabelomali sonyaka omusha - ozoqala ngoNtulikazi (July), babeke eceleni u-R64.8 million ozosetshenziselwa ukulungisa zonke izakhiwo zokuphehla amanzi ezakhiwe eminyakeni edlule, kodwa ezingasasebenzi.
“Ziningi izindawo okukhalwa kuzona ngokuthi amanzi awaphumi, kodwa-ke iDumbe isele kakhulu ngentuthuko.
"Kulolu hlelo sizoqasha amalungu omphakathi aphinde aqeqeshwe ngoba yiwona okumele axoshe ikati eziko,” kusho uMfu Buthelezi.
Uthi u-60% wesabelomali uzothuthukisa ezolimo emphakathini. Utshele ILANGA ukuthi umasipala uzothenga amaloli awu-20 athutha amanzi.
Uveze ukuthi bewumasipala bebekhokha u-R36 million ngonyaka, bekhokhela amaloli ahambisela umphakathi amanzi, okuzothi uma bethenga awabo, bakwazi ukonga u-R8 million kulesi samba ebesimuka nomfula - berentela amaloli.
"Kasifuni kube nomuntu ozokhala ngokuthi amanzi akawatholanga. Sizwile ukuthi bekunesililo esikhulu sokuthi amaloli amanzi abekhetha abantu ngokwamaqembu ezepolitiki.
"Kulolu hlelo, sisungule nekomidi lezinduna emphakathini elizoqinisekisa ukuthi uhlelo lwamanzi luhamba ngobulungiswa, akekho umuntu oncikiselelwayo,” kusho uMfu Buthelezi.
Kuphinde kwethulwa nosonkontileka ozokwakhela umphakathi izindlu zangasese, okuzoba yizindleko zikaR46 million.
Kulo mcimbi bekukhona neMeya yaseBig Five Hlabisa, uMnu Velenkosini Hlabisa, oqokwe yi-IFP njengozoncintisana nabagaqele esokuba ngundunankulu waKwaZulu-Natal, othe makunikezwe abantu izinsiza zokusebenza umhlabathi ukuze baphile kahle.
Sizoqasha umphakathi uqeqeshwe ukuze uxoshe ikati elilele eziko.