UQhosha ukhala "ngendelelo" yeGcokama
IGcokama lithe belingeke liyivimbe imbongi uma yenza umsebenzi wayo
UYAVEVA ngakubiza ngokwehliswa isithunzi umculi kamasikandi, uQhoshangokwenzakwakhe Sibisi, othi uthukiwe kwi-albhamu entsha kazakwabo kulo mculo, uMthandeni “iGcokama Elisha” Manqele ethi “Dog Style", kwathiwa uncela isitho sangasese sikaKhuzani "iNdlamlenze" Mpungose obalwa nezinkunzi zalo mculo. Kule ngoma kupikwe imbongi, uMphako Mkhwanazi, okuyiyona esolwa ngokushiya engalazi kuQhosha ize imbize ngegama. UQhosha utshele ILANGA ukuthi ukuhlazwa kwakhe ngalolu hlobo, kumehlisa isithunzi emphakathini nasezinganeni zakhe ngoba kuchazwa ukuthi ubudoda bakhe kabuphelele. “Ingiphathe kabi le nto ngoba kayikho ingxabano engiyaziyo ephakathi kwami
noMthandeni. Besixhumana phambilini kodwa ukuthi sesixabane nini-ke, angazi.
"Le nto ayenzile nembongi yakhe, iqhatha izwe. Ngokwami ngithukwe nguyena ngqo uMthandeni ngoba ukuba ubengayithandi le nhlamba, ubezoyikhuza imbongi,” kusho uQhosha.
Uveze nokuthi emuva kokuzwa le ngoma, ubhalele iGcokama Elisha umyalezo elazisa ngokungaphatheki kahle, kodwa wangawuphendula. Libuzwa iGcokama Elisha ngezinsolo zokuthuka lo mculi, lithe belingeke liyivimbe imbongi uma yenza umsebenzi wayo.
Lithe mhlawumbe ukuba bekuyilona imbongi, belizoziqaphela izinto elizishoyo. "Ngeke imbongi ngiyenzele umsebenzi wayo ngiphinde futhi ngiyikhokhele imali yayo.
Ngizwile impela ngabantu bethi uQhosha uthintekile kule ngoma, kodwa-ke bengingekho ngesikhathi iqoshwa e- studio ngoba bengimatasa nemisebenzi eminingi ebengiqashwe kuyona.
"Ngisazoxhumana nayo imbongi nophrojusa ukuze bangichazele kahle ngoba uma le nto yokungiqhatha nabantu beyenze ngenhloso, kuzomele baxosheke emsebenzini wami,” kusho uMthandeni.
UMphako uthe uyadideka ukuthi kungani uQhosha ahlabeke ngoba baningi oQhosha ezweni.
"Sekwabakhona oQhoshakufanele, oQhoshangesikweletu noQhoshangomphako," kusho uMphako.
Ingwevu kwezobuciko bobumbongi, inyosi yeSilo, uMnu Buzetsheni Mdletshe, ithe kuyiphutha elikhulu ukusetshenziswa kwenhlamba ezibongweni.
“Kusetshenziswa izigameko kodwa ngamagama ayinhlonipho, hhayi inhlamba. Ungazifunda zonke izibongo zamakhosi amadala, kwakukhona lapho exwayiswa khona yizimbongi uma engenzi kahle kodwa hhayi ngenhlamba.
"Ngiyakulandula impela lokho kuyindelelo, kayikwenzi imbongi ngokwesintu,” kusho uMnu Mdletshe. Naye uQhosha ukhiphe i-albhamu entsha.