Udlondlobala kwiGagasi
Obeyipetshisi loKhozi FM
UKUBA yingxenye yezintokazi ezizakhele udumo ngokubanga umsindo emsakazweni uKhozi FM, zibizwa ngamaPetshisi oKhozi FM, kumnike uthando lokuba ngumsakazi uThandi Mhlongo odume ngelikaZisto kwiGagasi FM. UZisto ubeyingxenye yamaPetshisi, abesakaza noVukani “Chilli M” Masinga oKhozini FM. UZisto usematheni kulezi zinsuku ngemuva kokuhlabana ngendondo emncintiswaneni weLiberty Radio Awards obungoMgqibelo eSandton, eGoli. Kulo mncintiswano uhlabane ngohlelo lwesikhashana obelungoZibandlela (December) kulo msakazo obelubizwa ngeThe Block Party, abelwenza noNjinga Mpanza. Lesi siphalaphala sentokazi sithi kusukela ekukhuleni kwaso, besithanda ukugqama ngokujabulisa abantu, siphinde sifundise inqobo nje uma sizoba phambi kwabantu. UZisto obenengxoxo ekhethekile naleli phephandaba ngoLwesibili emini, udalule ukuthi nakuba uthando
lokuba semkhakheni wezikaqedisizu-ngu lumqale esakhula eClermont, entshonalanga yeTheku, kodwa ukuba yingxenye yezi-ntokazi ebezisakaza noChilli M yikhona okumvulele amathuba, nokubona ukuthi kwenzekani emsakazweni.
“Besifika e- studio sibange umsindo singaholi kodwa bekuba mnandi, yilapho ngibone khona ukuthi ngiyayithanda le nto futhi ngifuna ukuyenza,” kusho uZisto. Uthi yilapho efikelwe khona wugqozi lokuthola umsakazo womphakathi azoqeqesheka kuwona.
“Ngibe nenhlanhla ngangena kwiDYR okuyilapho engifunde khona ngokusakaza.” UZisto uthi ukungena kwakhe kwiGagasi FM eminyakeni emithathu eyedlule, kube yisibusiso esikhulu, kwazise kakubanga yinto elula. Uthi uhlangane noMzokhona “Mzokoloko” Gumede obengumsakazi weGagasi ngaleso sikhathi, wamcela ukuba amsize ngokwenza i- demo okuyiyona ayisebenzise ukungena kulo msakazo.
“Ngesikhathi ngifika kwiGagasi, nginikwe isikhathi sasebusuku okuyisona engiqeqesheke kusona. Bekumele ngisizwe nguNomalanga ongiqeqeshe isonto elilodwa ngabe sengizimela.” Unanele ngokuthi kakubanga lula ngesikhathi esaqala ukusakaza kwiGagasi ngoba ubevuka ayosebenza emsebenzini wakhe abe
wenza ngaleso sikhathi, kuthi ebusuku abuye azosakaza. UZisto uthi ngesikhathi enikwa inkontileka egcwele kulo msakazo, uphoqeleke ukuba asule (emsebenzini abewenza), kwazise bese kufana nokufezeka kwephupho lakhe. “Nakuba imali ibingalingani naleyo ebengiyihola emsebenzini ebengiwenza ngokugcwele, wokusebenza ehhovisi, kodwa ngenxa yothando lomsakazo kangizisoli,” kusho le ntokazi enezwi elimtoti futhi ebukekayo. Lo msakazi useshayela yedwa uhlelo lwasentathakusa ngezimpelasonto. Lolu hlelo lukhombisa ukukhula nokuthakaselwa ngabalandeli okuyisimanga. Kulezi zinsuku ubambe uhlelo lwasemini yasekuseni phakathi nezinsuku, olubizwa ngeThe Gold Circle. UZisto ubambele okwesikhashana uMfundo The Dazzling One kulolu hlelo njengoba le ntokazi isathathe ikhefu. Uthi uzizwa ethobekile ngokubamba lolu hlelo kanti ukuthola leli thuba kuhambisana nokwenza kahle kwakhe ezinhlelweni anikwa zona.
Mayelana nokuhlabana ngale ndondo, uZisto uveze ukuthi kusho lukhulu kuyena njengoba kukhombisa ukuthi usendleleni eqondile yezokusakaza.
“Kimina kusho ukuthi mangiqhubeke ngale ndlela engihamba ngayo, ngithuthuke futhi ngizimisele ngoba sengiyaqala ukubona izithelo. Okuhle wukuthi nomama wami usezobona ukuthi kukhona lapho ngiya khona ngokusakaza,” kusho uZisto onohlelo lwakhe kwi-You
Tube, iDeeply Rooted DBN, olukho-mbisa ngezokuvakasha nempilo yobumnandi yaseThe-kwini namaphethelo. Uthi lolu hlelo luyafundisa futhi luyajabulisa.
“Ngifuna ukuthi uma kunosaziwayo waphesheya kwezilwandle ozofika kuleli, kucatshangwe igama lami ngokumele ampheke ngemibuzo futhi amkhombise nezindawo ezikhona zokuvakasha kuleli.”
Unendodakazi eneminyaka ewu11 ubudala azwakalise ukuthi konke akwenzayo ukwenzela yona njengoba ezimisele ngokuba ngumama oqotho. Uthi okunye azimisele ngokukuzuza manje empilweni yakhe wukuhlabana ngeziqu zeCommunication Science aseqalile ukuzifundela. Uphethe ngokuthi unesifiso sokushayela uhlelo lwantambama ngolunye usuku.