Baqolwe kusetshenziswa igama likaMnu Senzo Mchunu
Babili asebevelile enkantolo ngale nkohlakalo
SEKUBOSHWE ababili ngokuqola abantu imali besebenzisa igama lowayengundunankulu KwaZulu-Natal, uMnu Senzo Mchunu. UMnu Lucky Nhlanhla Zondi, obezibiza ngoLucky Nhlanhla Sokhela noMnu Paulos Ndlovu ongujele eMgungundlovu, kuthiwa bakwenze lokhu besebenzisa imidanti kamakhalekhukhwini efana nekaMnu Mchunu.
NgoMsombuluko laba ababili bebevele enkantolo yamacala obugebengu obuphathelene nemali, eGoli, babhekene namacala okukhwabanisa, wukweba nokuvuzisa ngokungemthetho ukuxhumana.
UMnu Mchunu uzwakalise ukudabuka kwakhe ngalabo ababe yizisulu zalo mkhuba.
“Yisimo esizwisa ubuhlungu engingeke ngafisa ukuba sehlele omunye umuntu.
"Ngiyaxolisa kakhulu kwababe yizisulu zalo mkhuba kusetshenziswa igama lami. Bekungemina owenze lokho," kusho yena.
Wengeze ngokuthi uyathokoza ngenqubekela phambili esiyenziwe
ngabomthetho njengoba sekudlule isikhathi eside “sokubekezelela ukuphoxeka” izandla zakhe zibe zibophekile. Sekwandile ukuthi kube nabantu abaqola abanye besebenzisa izinombolo zabantu abathile, ikakhulukazi abangosaziwayo.
Abadlali bakanobhutshuzwayo, sekukaningi yenzeka kubona le nto, kuthunyelelwa izihlobo zabo imiqhafazo, kucelwa imali sengathi yibona abayicelayo.
Isitobha seKaizer Chiefs, uRamahlwe Mphahlele imehlele le nto esagijima kwiMoroka Swallows, uSiyabonga Nomvete ongumgadli wamaZulu FC, naye izinswelaboya zimgilile eminyakeni edlule.
NoLebohang Mokoena ozakhele igama kwi-Orlando Pirates, naye uke waba yisisulu salokhu kuqolwa kusetshenziswa igama lakhe engazi.
Kulandele uKatlego Mphela ngo2012 owayegijima kwiMamelodi Sundowns ngaleso sikhathi, kanti ngo-2014, kugilwe injini yeChiefs, uGeorge Maluleka.
Kubikwa ukuthi izigilamkhuba ziye zithole indlela yokucisha inombolo yomnikazi bese ziyibhalisa kabusha ukuze zikwazi ukwenza le mikhuba.