Inombolo ezosiza izisulu zodlame
Bathi imishini yabo izokwazi ukulandela iphimbo lapho likhona
KUKHISHWE inombolo eyisixazululo kubo bonke abayizisulu zodlame lwemindeni KwaZulu-Natal, eyethulwe ngokusemthethweni ngoLwesibili wuMnyango wezokuThuthukiswa koMphakathi oholwa nguNkk Weziwe Thusi.
Le nombolo ethi: 087 158 3000 yethulwe nesikhungo esiyi- call centre esinobuchwepheshe bale mihla emahhovisi alo mnyango eMgungundlovu.
UNkk Thusi uthe leli yigxathu eliya phambili elithathwe wumnyango wakhe ukunciphisa izigameko zokuhlukunyezwa kwabesifazane, abantwana nawo wonke umphakathi.
“Le ndawo esiyivulayo namuhla ibikhona kusukela ngo-2009, kepha ibingenabo ubuchwepheshe obufana nalobu obukhona lapha. Sisizwe ngabakwaVodacom abanikele ngale nombolo yamahhala futhi okuzothi uma umuntu osenkingeni
efona, sikwazi ukumbona kulelo khona akulo ngisho singambuzanga.
“Kuyaziwa ukuthi uma umuntu ehlaselwa, kuyenzeka angakwazi nokukhuluma isikhathi eside, lelo phimbo lakhe elisuke libalisa, le mishini yethu izokwazi ukulilandela lapho likhona, sixhumane neminyango efanele asheshe athole usizo. Siyabakhuthaza nabesilisa abahlukunyezwayo bayisebenzise le nombolo,” kusho uNkk Thusi.
Ngaphandle kwalesi sikhungo, uNkk Thusi wethule izimoto eziwu-133 ezintsha ceke, okubalwa phakathi kwazo amaloli azothutha ukudla okuzoyiswa ezikhungweni eziwu-7, bese amaveni akuthathe ekuyisa ezindaweni ezifanele.
Imvamisa izimoto ezithengwe yilo mnyango zidonsa ngawo wonke amasondo ukuze zikwazi ukufinyelela kubantu.
Umcimbi uqale ekuseni ngehora lesi-9 usakazwa bukhoma Okhozini FM ohlelweni lukaDudu Khoza, oluthi “Jabul’ Ujule”, lapho uNkk Thusi ebechazela khona abalaleli ngale nombolo. Lapha uthe noma ngubani osuke esenkingeni yokuhlukunyezwa - noma ngabe ngokwaluhlobo luni - makashayele kule nombolo yabo.
Uthe kunosonhlalakahle abathathu ababhekene nalo msebenzi, abawuqeqeshelwe, banomphathi wabo.
UNgqongqoshe Thusi uvale ngezwi elithi: “Makungadlalwa ngale nombolo, mayihlonishwe kushaye labo abasenkingeni kuphela. Isebenza imini nobusuku.”
UNkz Eleni Kwinana, wakwaVodacom, uthe inkampani yabo izibophezele ukugcina umphakathi uphephile ngoba nabo luyabakhathaza udlame lwemindeni oluqhubekayo eNingizimu Afrika.
“Siqale ukuxhuma lobu buchwepheshe bethu ngoMfumfu ( October) nyakenye, ngoZibandlela ( December) sabuhlola ukuthi busebenza kahle yini njengoba sesizovula isigaba sokuqala. Siyabuya sizovula esesibili esingesokuthi sikwazi ukubona lapho ohlukunyezwayo ekhona,” kusho uNkz Kwinana.
IMeya yaseMgungundlovu, uNkk Thobekile Maphumulo, ithe bathokoze baswele imilomo ngokwenziwe wumnyango kaNkk Thusi nabo bonke abathintekayo.
“Sinethemba lokuthi buzoke bunciphe ubulwane obuhlasele abantu bakithi uma sekukhona indlela elula yokubaceba enjengalena,” kusho uNkk Maphumulo ongundlunkulu weNkosi Mhlabunzima Maphumulo yaseMaqongqo engasekho.
Uma umuntu ehlaselwa, kuyenzeka angakwazi ukukhuluma isikhathi eside.