NONHLAKANIPHO SHINGA:
IZINSIZWA ezine zasenyakatho yeKwaZuluNatal, zingene ngezinkani emkhakheni wokuqeqesha abafuna ukuba nemizimba ehlala isesimeni esihle, noma abazimisele ngokwehlisa isisindo besebenzisa ukuvocavoca imizimba yabo nje kuphela. Lezi zinsizwa ezisho ngama-6 pack aconsisa amathe ezintokazini eziningi, zizibiza nge-Zulu Transformerz. Leli gama balisusela ekutheni ngokuzalwa vele bangamaZulu, futhi inhloso yabo wukushintsha imizimba yabantu abasebenzisana nabo.
IZulu Transformerz yakhiwe nguMnqobi Kunene (28) waseMondlo eVryheid, u-Ayanda Mthembu (28) waseMpangeni, uVeli (29) noMthokozisi Ntshangase (22) bobabili abazalwa ndawonye KwaNongoma. Lezi zinsizwa zithi zibone kunesidingo esikhulu sokuba zifundise abantu le ndlela eziyisebenzisayo yokuzivocavoca, ezithi isiqale ukwanda umhlaba wonke.
Ziqale ukusebenzisana nabantu abafuna ukuzivocavoca ngoba zifuna ukwakha amamasela, wukushisa amafutha noma ukugcina imizimba yazo ibukeka kahle. Nakuba ziqale ezinyangeni ezimbalwa ezedlule kodwa kuyimanje sezinabantu abangaphezulu kuka-150 abasebenzisana nazo izinsuku eziwu-6 ngesonto.
Okumangazayo wukuthi ibhizinisi lokufundisa abantu ukuzivocavoca libonakala likhula imihla namalanga njengoba sekunezindawo eziningi ezifundisa lokhu, ikakhulukazi lokhu okwaziwa ngama- outdoor gym.
Nokho lezi zinsizwa zithi okwamanje lokhu zisakwenza mahhala ngoba kazijahile ukuqala ngokugaya imali ekubeni ungakabi bikho umehluko obonakalayo. Indlela ezizivocavoca ngayo, zithi yi- bodyweight training noma yi- calisthenics nama- street workouts lapho zithi phakathi kwezikufundisayo wukusebenzisa umzimba nje kuphela, okwenza ukwazi ukuzivocavoca noma ngabe ukuphi.
BAJIMISA EGLENWOOD, EMOSES MABHIDA NASEWORKSHOP
Lezi zinsizwa zijimisela eBulwer Park, eGlenwood, kusukela ngo17h30 kuya ku-19h30 ngoMsombuluko kuya kuLwesihlanu, kanti ngoMgqibelo kuba ngu-05h30 kuya ku-07h30 basuke bengaphandle kwaseMoses Mabhida Stadium, ngo-07h30 kuya ku-09h30 basuke beseGugu Dlamini Park, eWorkshop, enkabeni yeTheku lapho benza khona amabootcamp. “Indlela esizivocavoca ngayo kayihlanganisi mishini noma kakukho okunye esikusebenzisayo kepha sinyakazisa imizimba yethu nje kuphela. Okuhle kakhulu ngalokhu wukuthi ulwazi uhlala nalo okukunika ithuba lokuqhubeka nokuzivocavoca noma kuthiwa kawusakwazi ukuzoyibamba nathi. “Uzijimele usekhaya ngoba siyakufundisa ukuthi ukuze kukusebenzele futhi kushintshe nomzimba wakho kumele wenze kanjani,” kusho uMnqobi.
Phakathi kwento athi bagxila kakhulu kuyona, wukuzivocavoca ngendlela ezokwazi ukwenza ukuba isisu sakho sibe yilokhu okufunayo.
“Kubalulekile ukuba isisu sakho sikufundise ukuthi usivocavoca kanjani ngoba le ndlela esisebenza ngayo isitshela ukuthi yisona esiyinjini. Ngakho-ke kubalulekile ukuba wonke amamasela asesiswini siwasebenzise. Yingakho kuthiwa noma ungazivocavoca kodwa amaphesenti angu80 asekhishini, okuwukudla okudlayo.
IMISIPHA KUMELE IGCINWE YELULEKILE
“Kumqoka-ke ukuba naso isisu siphinde sisivocavoce ngendlela okuyiyonayona, okuyinto abantu abaningi abanenkinga ngayo. Siyakufundisa ukuthi uma ufuna ukwakha izingalo wenza kanjani nokuthi nxa uzimisele ngokwakha imilenze emihle uphinde wenze kanjani. Konke lokhu ukwenza ngomzimba wakho nje kuphela,” kuqhuba uMnqobi.
Uthi njengoba imizimba inemisipha, yingoba vele yayidalelwe ukuba inyakaze. Uthi kubalulekile futhi nokuba yelulwe ngaphambi kokuba uzivocavoce.
“Ngaphambi kokuzivocavoca, siyazelula imizuzu engu-30 ukuze imizimba ifudumale kahle, bese siyaqala-ke siyasebenza. Sikhethe ukuba siqale ngokusebenza nabantu mahhala ukuze sizakhele igama. Ngale kwalokhu, sifuna ukuba abantu bayibone into esikhuluma ngayo.
“Njengamanje siyaziqhenya kakhulu ngokuthi kubantu esesisebenze nabo, bakhona ababona umehluko okuyinto eyenza siziqhenye ngoba inhloso wukushintsha impilo yabantu, kakukhona ukwenza imali kuqala,” kusho uMnqobi.
Uthi okunye abakwenzayo okwehlukile wukuqinisekisa ukuthi bayagqugquzeleka abantu abasebenzisana nabo, nokuthi nabo bayazazi ukuthi yini abafuna ukuyizuza ngokusebenzisana nabo.
“Kubalulekile ukuba ube nento ekugqugquzelayo ngaphambi kokuqala ukuzivocavoca ngoba lokho kukusiza noma sekuthi shiya endleleni. Abantu abaningi bakhokha izizumbulu zemali emajimini kodwa bagcine bengayanga, kujime imali yabo ngoba engekho umuntu obamele, obagqugquzelayo.
“Thina-ke siyakwenza lokhu ngoba senzela ukuthi noma sebebona kunzima kodwa bazi ukuthi inhloso wukuba bathole imiphumela ezoshintsha impilo yabo ngokuba behlise izisindo, okusho ukuthi kawukho emathubeni okuhlaselwa yizifo ezibulala abantu abaningi abakhuluphele njengesikashukela, ngesenhliziyo eshaya ngamandla, ukuba namafutha amaningi emzimbeni nokunye,” kusho uMnqobi.
Maduzane uthi bazoqala uhlelo lokujimisa izingane ezincane ngoba sebebonile ukuthi zikhuluphele ngokweqile, okuzikhinyabeza ezintweni eziningi.
“Izingane eziningi zinesisindo sabantu abadala okuyinto engalungile ngoba zigcina zikhinyabezeka. Sizoqala uhlelo lapho abazali bezoletha izingane zabo sizifundise ngokubaluleka kokuzivocavoca nokudla ngendlela efanele zisencane okuyinto ezizokhula nayo,” kuphetha uMnqobi.