MAWUNIKWE ITHUBA UMTHETHO
MHLELI: Kunesaga sesiZulu esithi: “Impunzi iyathakatha ngokukhamela icimbi ethuvini beqhina”.
Ngokomqondo osobala, ngingasihumusha lesi saga ngokuthi sekwande umkhuba omubi lapha esizweni wokusebenzisa imfundisoze ukubheca ngobende umuntu inyama engayidlanga. Phela uma impunzi ikhamela icimbi ebulongweni beqhina kuzosolwa lona, hhayi impunzi.
Nalapha ezindabeni kukhona abathakathi bakhona, okuthi izindaba ziqondile bona bazithakathe, bapotshozele izintatheli imibiko ethakathiwe ukuze zisho lokhu okuvuna bona. Isikhathi esiningi basuke befuna ukuqhuba imisebenzi yobumnyama engekho emthethweni.
Ngendlalela kanjena ngenxa yodaba oluphume kwiLANGA ngoMsombuluko ngaphansi kwesihloko esithi: “Umnyango wehlulekile wukuvimba inkantolo”.
Lesi sihloko simayelana nodaba oluthinta uMasipala waseMthonjaneni nowaseNkandla mayelana nezinyathelo zomthetho ezithathwe wuMnyango wezokuBusa ngokuBambisana KwaZuluNatal, zokuthi labo masipala bathathelwe izinyathelo ngoba bengalandelanga imigudu efanele ngesikhathi beqasha izimenenja zabo. Bazokhumbula abafundi ukuthi umnyango, oholwa nguNgqongqoshe Nomusa Dube-Ncube (osesithombeni), ngesikhathi ubona iphutha elenziwa yilabo masipala, wabeluleka ukuba balilungise.
Kuthe ngemuva kokushaya indiva leyo mizamo, ngisho nekangqongqoshe kazwelonke, wabe esenikela enkantolo ngoba izwe liphethwe ngomthetho - ophula umthetho kufanele athathelwe izinyathelo, ajeziswe ngendlela efanele. Nebala inkantolo yanquma, yaqinisekisa ukuthi okwenziwe yilabo masipala ukuqasha izimenenja kwephule umthetho, yaphinde yengeza ngokuthi kweqiwe abantu ababenakho konke okubenza baqasheke. Ngemuva kokuphuma kwesinqumo, labo masipala bafake isicelo sokudlulisa icala ngoba bekholwa wukuthi mhlawumbe inkantolo engaphezulu ingafinyelela kwesinye isinqumo esehlukile (ngokodaba esiphonselwe wumnyango kodwa ijaji lasamukela).
Yindlela umthetho wezobulungiswa wethu njengezwe osebenza ngayo leyo, lokhu kakusho ukwehluleka komnyango futhi akuguquli amaphuzu akhishwe yinkantolo okuthi labo masipala bephule umthetho ngokuqasha izimenenja.
Ukudlulisa icala kumisa okwesikhashana isinyathelo sokuthi siwumnyango senze lokhu okushiwo yinkantolo sibakhiphe ezikhundleni abantu abangakulungele ukuba kuzona, kushushiswe.
Kubalulekile ukuqaphela lapha ukuthi isinqumo esikhuluma ngaso sekungesenkantolo enkulu, ijaji, hhayi nje umnyango kuphela. Ngiyafisa ukuveza ukuthi izinkantolo ezingaphezulu zisenganquma noma yikanjani. Okusenzekile manje wukuthi omasipala bathole imvume yokudlulisa icala bephikisa isinqumo seNkantolo eNkulu.
Siyafisa umphakathi ungadukiswa ngokuthi uma kuphasiswe ukudlulisa icala kusho ukuthi usuphumelele noma isinqumo sesiwujuqu, kusenokwenzeka amajaji avumelane nenkantolo yokuqala asenze isigwebo futhi sibe ngesikhulu.
Siyazi ezikhathini eziningi icala wumphikwa, uthi umuntu ebona ukuthi umbhalo usodongeni kodwa athalalise aze angene eweni. Kwesinye isikhathi umuntu uyalisebenzisa ithuba lezinkantolo ukuthenga isikhathi ngoba uyazi ukuthi ingalo yomthetho yinde futhi ihamba ngolonwabu, kodwa okumnandi wukuthi icala kaliboli futhi ligcina liquliwe.
Kubalulekile uma kubikwa ngalolu daba kungasheshe kwehlulelwe, kudukiswe umphakathi ngoba amathe angabuyela kwasifuba noma yinini. Umnyango wethu uzolokhu uveze ubufakazi ufuna nobulungiswa egameni lomphakathi ngoba sonke isono sinesijeziso sakhona. Okwamanje ake sinike umthetho ithuba ngaphandle kokwahlulela, siqaphele abathakathi bezindaba abahlanekezela amaqiniso.