Nabesifazane mabavunyelwe ukuthatha isithembu
UMDLALO owuchungechunge, Isibaya, uyenzile indaba ngoba iningi lamadoda likhuluma ngesithembu kulezi zinsuku.
Laba abasifisayo isithembu basuke bezicabangela ngenkanuko yocansi nje kuphela, kanti kabazi ukuthi ukujabulisa abafazi abaningi kakusiwona umbhubhudlo.
Noma ngabe uyinkunzi yohlobo, ibhulamani loqobo, uyophela wuchatho kuze kuphele ilasitiki, kuthi lapho uthe wasuza, kuzwakale sengathi yingane esafunda ukushaya umlozi.
Kunomunye umngane wami, uMkhipheni, othi isithembu siyasiza ngoba abantu besifazane baningi ukwedlula amadoda, ngakho indoda kumele ibathathe babe baningi (abesifazane).
Uthi usezamile ukuyixoxa leyo nowakwakhe, kodwa kabavumelani. Uthi unayo imali, ngakho akayiboni inkinga uma ethatha umfazi.
Angabathumela nakoDubai, Paris naseRome bayothenga imfashini khona uma befuna. UMkhipheni uthe yena akadli izambane likapondo ngoba lokho okwezigwidlana, yena udla imali engasukumi phansi, intalasididi, into oyoze uyilahle.
Nami-ke angimphikisi ngoba cha untanta kuyona imali njengedada lidada echibini. Usezithengile nezithombe engizidwebayo ngezinkulungwane zamarandi, angaceli nesaphulelo.
Uyazikhipha nje nezinkulungwane eziyishumi ngesithombe sisinye, sengathi uthenga usimangoluthi ( stick sweet).
Osiyazi-ke bathi amandla ocansi abantu besifazane nabesilisa ayaphambana ngeminyaka uma sikhula.
Bathi abesilisa badla ubhedu besengamabhobhodlwana baze babe neminyaka engamashumi amathathu.
Emuva kwalokho, kuba nhlanga zimuka nomoya, ubhongoza eseshukuma uma kuthanda yena njengenja engasalumi, esivilapha ngisho nokukhonkotha noma kudlula abantu esangweni.
Abesifazane bona kuthiwa inkanuko yocansi izipha amandla, ivuk' inj’ ebomvu uma sebefika eminyakeni engamashumi amane.
Mhlawumbe yingakho nje asebemnkantsh’ ubomvu bezithandela oBen10, amakhehla adlala ngamantombazanyana, wona angakazi ukuthi lidumephi.
Ukhona omunye umngani wami wesifazane naye onemali yakhe, owayefuna ukuba ngunina omncane wezingane zami ngoba ethi yena uyasithanda isithembu, uthanda inkululeko yakhe.
Uthi yena akafuni ukuhlala nendoda, uthanda ukuzihlalela emzini wakhe, bese kuvakashelwana uma efisa okwasembhedeni kuphela. Akafuni ndoda ezomshayela imithetho.
Uthi abesifazane banelungelo lokukhetha ukuba sesithenjini noma babe nesabo isithembu, lapho nabo bezoba namadoda abazijabulisa nawo, kungabikhona muntu ovukwa yisikhwele.
Inkululeko iyabavumela abesifazane njengoba iningi lingasadingi ukunakekelwa ngamadoda. Bonke abantu bayazisebenzela kulezi zinsuku.
Vele amadoda aqonyiwe, ngisho nalawo ashadile, okusho ukuthi ziningi izithembu ezingekho emthethweni, izinto zenzelwa ebumnyameni.
Isithembu vele nasemandulo sasenzelwa ukuba umnumzane aziwe ukuthi ujolaphi nobani, kuthi lapho izinkomo zanda, bese elobola, andise abafazi.
UMkhipheni yena akayivumi lena yokuba nabesifazane bangaba nesithembu ngoba ethi njengoba bebaningi ukwedlula amadoda, bayolwa bodwa.
Uthi yena okubuye kwenze izinto zibe nzima kakhulu, wukwanda kwamadoda ajola namanye amadoda. “Kumanje abesifazane babanga amadoda nezitabane, kuyoba njani-ke uma nabo sebethatha izithembu?
"Kuyoxabana ubendle. Lowo mfazi oyothatha isithembu uyoshaywa ngabanye abafazi, bemshayela wona la madoda,” sekusho uMkhipheni.
Mina ngithi abafuna ukuthatha isithembu, mabasithathe ngoba phela amalungelo ngawabo, inqobo nje uma kuvunyelwana.
Akekho umuntu onelungelo lokushayela omunye umthetho wokuthi makajole nobani, nini kanjani.