IBay FC ixoshe engasabadingi
Isiphonse ithawula lokudlala kuma-play off
LIGQABUKILE igoda phakathi kweRichards Bay FC nabadlali bayo ababili okuvela ukuthi kabasekho ezinhlelweni zomqeqeshi uBrandon Truter.
IRichards Bay izobhekana neMaccabi FC koweNational First Division (NFD) ngeSonto ngo15h00 eMhlathuze Sports Complex, eRichards Bay.
Lo mdlalo sekufana nokuthi iBay iyozichithela isizungu nje ngawo kwazise isiliphonsile ithawula lokuyodlala kweyamaplay off.
IMaccabi yona iwafuna ephelele amaphuzu njengoba isengcupheni yokugengcwa yizembe.
Leli phephandaba lithole ukuthi iRichards Bay ngoLwesibili ntambama ikhombe indlela uMenzi “Meh” Hlophe obengumgadli wayo noLionel Saal odlala emuva.
Lezi zindaba ziqinisekiswe ngusihlalo wale kilabhu uSifiso “Jomo” Biyela ( osesithombeni).
“Isizini yethu isiphelile ayisekho into esisayidlalela sekuphelile ngathi ngokuya kweyama- play-off.
"Siqala amalungiselelo esizini ezayo manje sesiyisongile le sizini sesihlonipha imidlalo nje kuphela.
"Kuyiqiniso ukuthi laba badlali (Hlophe noSaal) sibadedelile emuva kokuba umqeqeshi enginike umbiko obuveza ukuthi abekho ezinhlelweni zakhe.
"Empeleni izinkontileka zabo ziyaphela ngoNhlangulana (June) ngeke vele zivuselelwe yingakho sibone kungcono sibakhulule kusemanje.
"Ngiyaqala ukuba nomqeqeshi onginika umbiko ingakapheli kwakuphela isizini ochaza umdlali ngamunye ukuthi wenzeni ngale sizini.
"Emuva kokufunda lo mbiko sibone kungcono ukuthi sibadedele laba badlali ukuze singabamosheli isikhathi babe beqala befuna kwezinye izindawo,” kusho uBiyela.
Uthi kulo mdlalo weMaccabi bazonika ithuba abadlali abangavamisile ukuthola ijezi ngenhloso yokubahlola.
“Lo mdlalo awusasho lutho kithina yingakho kufanele sibheke laba abebengavamisile ukuthola ijezi.
"Njengoba bengishilo siphezu kwezinhlelo zangesizini ezayo manje kangangoba kunabadlali esesibasayinise ama- pre contract engingeke ngikwazi ukubamemezela okwamanje ngenxa yokuhlonipha amakilabhu abakuwona.
Uma isimo sesivuma sizobamemezela,” kusho uBiyela. NGOMSOMBULUKO Napoli vs Atalanta 19h00. Imidlalo ye-Uefa Europa League namuhla ngoLwesine ihlelwe kanje: Valencia vs Villarreal 21h00. Eintracht Frankfurt vs Benfica 21h00. Napoli vs Arsenal 21h00. UMDLALI weMamelodi Sundowns ufuna ukusebenzisa imidlalo ye-Afcon ukufeza iphupho lakhe lokuyodlala e-Europe.
ULebohang Maboe usayiniswe yiMamelodi Sundowns ekuqaleni kwesizini esuka kwiMaritzburg United.
Selokhu efike kwiSundowns wenza izimanga njengoba eyishayela amagoli amqoka. Kulindeleke abe seqenjini lesizwe lakuleli iBafana Bafana elizodlala emqhudelwaneni weAfcon ozokuba se-Egypt ngoNhlangulana (June).
IBafana iku-group D ne-Ivory Coast, iMorocco neNamiba.
UMaboe uthi uyathandaza ukuthi abe khona eqenjini elizokuya kule midlalo ngoba ufuna ukuyisebenzisa ukuzibonakalisa kwizinhloli zaseEurope.
“Lo mqhudelwano uyahlonishwa emhlabeni kangangoba uheha izinhloli zase-Europe yingakho ngifuna ukuwusebenzisa ukuthi ngibonwe ukuze ngifeze iphupho lami.
"Ukuze kwenzeke lokho kufanele sikuqinisekise ukuthi iBafana Bafana yenza kahle kulo mqhudelwano. Ngiyazi ukuthi abantu abasiniki lutho.
"Uma nje amalungiselelo sizowenza ngokweqophelo eliphezulu angingabazi ukuthi sizohamba ibanga elide kulo mqhudelwano,” kusho uMaboe.