IBUYELA ETHEKWINI EYE-COCA COLA U/15
IBUYELA eThekwini imidlalo kazwelonke yeCopa Coca Cola U/15 ezoqala mhla ka-25 isongwe mhla ka-26 kuMandulo (September) eKing Zwelithini Stadium, eMlazi.
Ngemuva kwale midlalo, le nkundla izophinde isingathe ekazwelonke yamantombazane ka-U/13 neka-U/15. Sekunesikhathi iKwaZulu-Natal yagcina ukunikwa ithuba lokusingatha imidlalo kazwelonke. Nyakenye imidlalo yeCoke ibiseWolfson Stadium, eBhayi, kanti inqotshwe yiClapham yaseTshwane.
Imidlalo yokukhipha izingqwele zesifundazwe kwiDanone Nations U/12, izokuba mhla-11 kuNhlaba (May) eSugar Ray Xulu Stadium, eClermont, kanti ekaU/14 ebiyesekwe ngabakwaMcDonald, izodlalelwa eMgungundlovu ngoNcwaba (August).
Imidlalo kazwelonke yeDanone izokuba mhla ka-15 kuNhlangulana (June) eDobsonville Stadium, eSoweto.
INomlinganiselo Primary enqobe ngonyaka odlule, nezingqwele zakulo nyaka, bazokuya komela elakuleli emidlalweni yomhlaba ezokuba seBarcelona, eSpain ngasekupheleni konyaka. Kulo nyaka, amazwe athumela izikole ezimbili, okuyingxenye yemigubho yokuhlanganisa iminyaka engu-100 abakwaDanone besebhizinisini.
Konke lokhu kuqinisekiswe nguSmanga Mgenge onguNobhala weSouth African Schools Football Association (Sasfa) esifundazweni.
UMgenge oyiMeya yaseMfolozi, ubeyingxenye yokuvulwa kweMawombe Sports Field ngoLwesibili ekuseni, eCinci, eMfolozi.
Ubehambisana noBongi SitholeMoloi onguNgqongqoshe WezeMidlalo esifundazweni.
Kulesi sakhiwo, kunezinkundla ezimbili zikanobhutshuzwayo, yindawo yokudlala izingane, indawo yokuzivocavoca nezimbili zebhola lo mnqakiswano. Ngaphambi kokuvula le nkundla, lezi zikhulu zivule indawo yokudlala izingane nenkundla yebhola lo mnqakiswani ezikoleni ezimbili zaseMfolozi.
UMoloi uthe umnyango wakhe usazoqhubeka nokwakha ingqalasizinda yezemidlalo ezindaweni zasemakhaya ngoba sezikhombise kaningi ukuthi ziyalixosha ikati eziko, futhi zibamba elikhulu iqhaza ekukhuleni komnotho.
Izinkumbi zabantu ebezihambele lo mcimbi, bekuthi azihlanye zichazwa yizingoma ebeziqhululwa nguKhuzani “Indlamlenze” Mpungose oyisilomo sikamasikandi.