Ubhokode inyanga kolomvusankunzi
KUQAQAMBA izinhliziyo emndenini wenyanga yaseNtshongweni ngesenzo sekhasimende okuthiwa liyibhokode ngommese liphindelela ngeledlule liyisola ngokulidayisela umvusankunzi "owumbombayi". Kuthiwa umsolwa esingeke simdalule okwamanje, uthenge imbiza ewumvusankunzi kuMnu Nkululeko Zaca (35) ePinetown, wayiphuza evivela isinqandamathe sakhe ebesizofika, kodwa lutho ukuvuka inkunzi sesifikile.
ILANGA lithole ukuthi uMnu Zaca ubenendawo asebenzela kuyona ePinetown, edayisa izimbiza ezisiza abesilisa abanenkinga yokungavukwela yinduku. Kuthiwa abantu bebengena beshintshana endaweni abesebenzela kuyona.
Umsolwa kuthiwa bese kunesikhathi ebhekene nenkinga "yokukhophoza kwenduku", uthenge ibhodlela lembiza abengakaqedi ngisho ukuliphuza ngesikhathi ebulala uMnu Zaca, enethemba lokuthi uma eseyiphuze kanye kuzokwenzeka imilingo, uzophenduka uqanduqandu kowesifazane azwana naye.
Kuthiwa uphoxekile eseyiphuzile, enesinqandamathe sakhe, induku yangavuma ukunyakaza. Kuthiwa lokho kumenze wathukuthela wathelwa ngamanzi.
Kuthiwa uthethe ummese waqonda lapho kusebenzela khona uMnu Zaca engasadle nkobe zamuntu. Umngenele ngawo emgwaza ephindelela, emsola ngokuba yiqola, ethi umdayisele imbiza engasebenzi, nenkinga yakhe kayikalapheki.
Ngokuthola kweLANGA ngomthombo osondele nalolu daba, kodwa ocele ukungadalulwa, umsolwa ufike kuMnu Zaca wakhala ngokuthi ubukise ngaye phambi kwentombi yakhe esezilungiselele ukuthi kuzohamba kahle konke ngomcimbi wasekamelweni.
Umthombo uthi uMnu Zaca ushonele endaweni yesigameko kwazise namanxeba abemaningi. Uthi umsolwa uqede ukwenza lokhu wakha phansi ngejubane.
ILANGA likhulume noNkk Nomakhosi Mthembu, ongudadewabo kamufi, okuqinisekisile ukuthi umfowabo ubeyinyanga.
“Besingekho ngesikhathi kwenzeka isigameko sokubulawa kwakhe. Sithole ngabantu abebekhona ukuthi umuntu omgwazile ubedinwe wukuthi umdayisele imbiza engasebenzi.
"Ngokumazi kwami umfowethu, ubezipheka izimbiza ezisiza abantu besilisa futhi kugcwala endaweni asebenzela kuyona. Kusithusile ukuthi usengaze abulawe ngumuntu ngoba emsola ngokuthi umdayisele imbiza engasebenzi,” kusho uNkk Mthembu.
Utshele ILANGA ukuthi umfowabo ubeziphilisa ngokwelapha abantu, kodwa ngeke amkhulumele kakhulu ngoba ubengahlali naye. Uthi umndeni kuwuphathe kabi ukuthi umfowabo abulawe ngalolu hlobo ngenxa yomsebenzi oyisiphiwo sakhe.
Okhulumela amaphoyisa KwaZuluNatal, uCapt Nqobile Gwala, usiqinisekisile lesi sigameko. Uthe amaphoyisa abophe umsolwa ngecala lokubulala. Uthi uvelile eNkantolo yeMantshi ePinetown, icala lakhe lahlehlela uMfumfu (October).