Uzimisele ngokwakha igama emafilimini
Akagcini ngokulingisa, ubuye abe ngemuva kwamakhamera
UFISA ukushiya igama lakhe libalwa nawabakhiqizi bemidlalo kamabonakude namafilimu abahlonishwayo eNingizimu Afrika nakwamanye amazwe uThandeka Nodada (36), oshade nomqondisi wemidlalo owaziwayo eNingizimu Afrika, uZuko Nodada.
Lo mqondisi ubuye abe ngumlingisi njengoba edlala indawo yokuba nguthisha emdlalweni owuchungechunge, i-Isipho, odlala ngo-18h30 ku-e.tv ngoMsombuluko kuya kuLwesine.
UThandeka noZuko bangabanikazi beFinal Chapter, okuyinkampani ekhiqize ifilimu ebizwa nge-Uncovered, okudlala kuyona abalingisi abaseqophelweni eliphezulu eNingizimu Afrika, okubalwa kubona uSthandiwe Kgoroge, Fezile Makhanya noDumisani Mbebe.
Abaningi uThandeka bamazi ngethalente lakhe lokulingisa njengoba eke wadlala emidlalweni eminingi esingabala kuyona iTshisa, iMthunzini.com - lapho ayedlala khona indawo kaThuli i-A Place Called Home, iBay of Plenty ne-Erfsonders kanti ukhona naye kwi-Uncovered.
UThandeka, ongowokuzalwa KwaMakhutha, eThekwini, uke wadlala nasemidlalweni yeshashalazi esingabala kuyona iMedea, iGrease, iShowboat, iYou Strike A Woman ne-Animal Farm.
Uqede umatikuletsheni eKingsway High, ngaseManzimtoti, wayokwenza iziqu zeDrama eDurban University of Technology (DUT). Usuke lapho walibangisa ePretoria wayoqhubeke nezifundo zakhe, wenza iB. Tech in Drama eTshwane University of Technology (TUT).
“Bengifuna ukusondela eGoli njengoba bengazi ukuthi uma ngiqeda izifundo zami, kuzomele ngilibangise khona vele,” kusho yena.
Uthi ziningi izingqinamba abhekane nazo ngemuva kokuqeda isikole, enye yazo kube ngeyokuthi iningi labaqashayo emkhakheni wezokulingisa belingabheki ukuthi ukufundele yini lokho, kepha belibheka ukuthi udlisa kangakanani kuleso sikhathi, okuyinto athi ifaka ingcindezi ngendlela eyisimanga kubalingisi abaningi, ikakhulukazi abawufundele lo msebenzi.
Uthi benomyeni wakhe basungule iFinal Chapter ngoba benesifiso sokunika kakhulu abantu abawufundele umsebenzi wokulingisa ithuba.
Uthi kuze kwadingeka ukuba afunde ukusebenza ngemuva kwekhamera ukuze akwazi ukwandisa amathuba okuthola umsebenzi, njengoba ethi uqale waba yi-casting director lapho ebebheka khona ithalente emidlalweni eyahlukene, okubalwa kuyona neGreed and Desire. Nakhona lapho, uthi kudingeke ukuba akhule waze waba yiproduction manager, okuthe uma sebehlanganisa amakhanda nomyeni wakhe, babona kukuhle ukuba bavule eyabo inkampani. Ifilimu yabo, i-Uncovered, ingenye yakhonjiswe kwiDurban Film Festival kanti ithakaselwe ngabaningi.
UThandeka uthi kayamukelwanga kahle eNingizimu Afrika, kunalokho ithandwe kakhulu emazweni angaphandle okubalwa i-USA (Los Angeles), i-UK (London) neCanada njengoba ethi ezinyangeni ezimbalwa izophindela iyokhonjiswa eLondon ngokwesicelo sabakhona.
“Noma zikhona izingqinamba esibhekana nazo ekukhiqizeni amafilimu, kepha kuyimanje sibhala amanye amabili nemidlalo engama-telenovela. Ngiyazi abaningi bayaye bathi amafilimu kawazimakethi, kepha ngiyaye ngibuze ukuthi imali yokuwaqopha yona sisuke siyithathephi ngoba uxhaso kasilutholi,” kusho yena.
Uma ekhuluma ngokugcina eseshada nomqondisi ohlonishwayo eNingizimu Afrika, uvele afe yinsini njengoba ethi eqala ukumbona, wayehlanganiswe naye ngomunye wabangani bakhe kodwa wangazihlupha ngokumnika itoho.
“Ngangifonelelwe ngumama uMaMkhize komunye wabangani bami, wathi makangicelele itoho kuZuko. Ngisho sengihlanganiswe naye kanjalo, lutho ukunginika umsebenzi,” kusho yena efa yinsini.
Uthi kakuthathanga sikhathi esingakanani le nsizwa yase-Eastern Cape yacela uthando. Banabantwana abathathu abakhuliswa kakhulu yilowo obagadayo ngenxa yokuba matasa, kodwa isikhathi abasitholayo basichitha nezingane zabo.
Uma ezichaza, uthi ungowesifazane onamandla nosebenza ngokuzikhandla, kwazise ukhuliswe yimbokodo.
“Ngifisa ukukhunjulwa njengomunye wabakhiqizi bemidlalo abaqavile kuleli,” esho ngomoya ophansi.
Le ntokazi iphinde ibe neziqu zeBA in Communications eyazithola e-Unisa.