Wemukelwe ngezikhalo e-EC
URamaphosa ubathembise i-laboratory
WAMUKELWE ngezikhalo mayelana nokwenyuka ngamandla kwezinga lokudlwengulwa nokuhlunyezwa kwabesifazane ezindaweni ezakhele idolobha, iLusikisiki, neFlagstaff e-Eastern Cape, uMengameli Cyril Ramaphosa ngesikhathi evakashele eNgquza Sub-region, eFlagstaff, ngoLwesibili ukuyokwethula ngokusemthethweni uhlelo lokusheshisa ukuyisa intuthuko emphakathini.
Kulo mcimbi uMnu Ramaphosa uthembise ukuthi kuzokwakhiwa isikhungo sokucwaninga igazi (labolatory) e-Eastern Cape ngenhloso yokubhekana ngqo namacala okudlwengulwa kwezingane nabesifazane.
Ngaphandle kokuba yingxenye yalo mcimbi, umengameli uvakashele umndeni wengane eneminyaka ewu-6 okubikwa ukuthi idlwengulwe yisikhulu (52) somnyango wezemfundo.
Izakhamizi ebeziyingxenye yomcimbi zikhale ngokuthi amacala okudlwengulwa kwabesifazane aphelela emoyeni, amanye athatha isikhathi eside, kulokhu kuthiwa kusalindwe imiphumela yase-labolatory eCape Town noma ePretoria.
Ethula inkulumo yakhe uMnu Ramaphosa, uthe ukubona kuyimpoqo ukuba kube ne-labolatory ezokuba seduze kubantu base-Eastern Cape, njengoba lesiya sifundazwe sibalwa nezihamba phambili ngamacala okudlwengulwa kwabesifazane.
Uzwakalise ukudumala ngokuthi amaphoyisa ahhahhameza abesifazane abayovula amacala, wathi lokho kwakha isithombe esingesihle.
“Yingakho sinqume ukuba kwakhiwe isikhungo sokucwaningwa kwegazi la e-Eastern Cape ukuze amacala okudlwengulwa kwabesifazane asheshe,” kusho uMnu Ramaphosa.
UMnu Ramaphosa ubephelezelwa ngongqongqoshe abehlukene.
UNdunakulu wase-Eastern Cape, uMnu Oscar Mabuyane, usithakasele isinqumo sikamengameli - sokwakhiwa kwesikhungo sokucwaninga igazi wanxenxa nosomabhizinisi bendawo ukuba bahlukane nokutshala imali yabo kwezinye izifundazwe, kepha bayitshale e-Eastern Cape.
ILANGA belibikile ngoMsombuluko ngokuvakasha kukaMnu Ramaphosa e-Eastern Cape, lapho kuvele khona ukuthi kunabathile ebukhosini bamaMpondo abangeneme ngokuthi iKumkani yawo, uZanozuko Sigcau, kayithi vu ngezigameko zobugebengu.