BANIKELELWE AMABHAYISIKILI
SELUKAPAKELE entsheni ufuqufuqu lokusiza abantu abangenawo amandla okuzisiza enhlanganweni engenzi nzuzo, iYenzanathi Community Project, yaseBotha's Hill, eThekwini.
Le nhlangano esiza abafelokazi, ibafundise ezolimo ukuze baxoshe ikati eziko, isingene nasentsheni njengoba isithole uxhaso lwamabhayisikili awu-35 azosiza amantombazanyana endaweni angabi wuvanzi, kodwa afunde umdlalo wokushova.
IYenzanathi esungulwe nguNkk Lydia Hlophe, yenza umehluko omkhulu emphakathini njengoba abafana abaneminyaka ewu-7-19 ibatholele izinto zokudlala ibhola, beqeqeshwa ngabaqeqeshi abanesipiliyoni.
Ekhuluma neLANGA uNkk Hlophe, uthe yize ebesebenza nabesifazane betshala imifino, badayise imikhiqizo yabo ezimakethe, kodwa bekumkhathaza ukubona amantombazane nabafana behla benyuka emigwaqweni uma sekuphume isikole ngoba ingekho into abayenzayo.
“Bagcina sebema ezitolo, beba yizixongololo. Ngibe sengiqala ngizamela abafana uxhaso ukuze badlale ibhola, ngempela sabatholela amajezi okudlala namakhokho.
"Baqala badlala, kuthe ngokuqhubeka kwesikhathi, bathola abaqeqeshi bakhona emphakathini abebevolontiya ukubaqeqesha.
"Ngaleso sikhathi amantombazane abesalokhu eqhubeka eba wuvanzi, ngafikelwa wumqondo wokuba ngiwasize nawo ngiwatholele amabhayisikili azodlala ngawo.
"Asebatholile abantu abazowaqeqesha ukushova, inkinga esibhekene nayo manje wukuthola izigqoko (helmets) namathayithi lawa agqokwa ngabashovayo anezipontshana ezinqeni,” kusho uNkk Hlophe.
Ngaphandle kokusiza umphakathi waKwaNyuswa ngale ndlela, uNkk Hlophe uphinde abe nohlelo lwe-soup kitchen olusiza izingane eziyizintandane eziwu-257, ezidla ekhishini lakhe isidlo sasekuseni nesantambama.