Bahlabane ngenkontileka noBoxer
Bakhiqiza amalahle okosa
UKUNGAWUTHOLI umsebenzi emuva kokuphothula iziqu ezikhungweni zemfundo ephakeme kuholele ekutheni izinsizwa ezine zaseSouth Port, ePort Shepstone, zihlanganise amakhanda zafuna ukusungula into ehlukile, ezovulela nenye intsha amathuba okuxosha ikati eziko.
Lokhu kuholele ekubeni ngo2017 uMnu Ayanda Mavundla (30), uMnu Thabani Mavundla (30), uMnu Ndumiso Mbili (30) noMnu Zwelibongile Mavundla (27) bagcine besungule inkampani yamalahle (okosa) ebizwa ngeFire Kings Charcoal.
Le nkampani isihlabane ngenkontileka yokusabalalisa la malahle ezitolo zakwaBoxer iNingizimu Afrika yonkana, kuhlanganisa neziseSwazini.
Ngokusho kuka-Ayanda, bathe uma bebona isimo sabo sokuhlala emakhaya neziqu, zingabasebenzeli - bakhetha ukuhlanganisa amakhanda bacabanga ukuthi yini abangakwazi ukuyenza ezobangenisela imali, iphinde ibabeke esimeni sokuba bavulele abanye abantu amathuba emisebenzi, ikakhulukazi baseKokstad nabaseZingolweni.
Bathi baqale ngokuxhumana noMnu Sibongiseni Mbili, onguyise kaNdumiso, bamtshela ngombono wabo, wabeseka kakhulu, kwazise naye ungusomabhizinisi ohlonishwayo ogwini oluseningizimu yeKwaZulu-Natal njengoba enamapulazi omoba nawamahlathi akhiqiza izingodo.
“UMnu Mbili nguye esihlale phansi naye samtshela ngombono wethu, wakhombisa ukuweseka kakhulu, kwazise ubenalo nolwazi lwamalahle. Ukusethemba kwakhe nokusinika indawo yokusebenzela, kusenze sabona ukuthi ngempela ikhona le nto esifuna ukuyenza.
“Sibe sesiqala ngokuhlanganisa imali yokuqala ukuze ibhizinisi lisukume, kodwa ngaphambi kwalokho, senze ucwaningo lokuthi yini thina esizokwehluka ngayo kulo mkhakha,” kusho yena.
Uthi ocwaningweni lwabo bathole ukuthi kababaningi abantu abamnyama abenza i-charcoal, nokuthi labo abawenzayo lo msebenzi amalahle bawalanda kwamanye amazwe, njengaseNamibia.
“Lokhu kusitshele ukuthi kuningi esizokwehluka ngakho njengoba thina sizakhela wona, okuyinto ebeyibaluleke kakhulu kithina ngoba lokhu kusho ukwanda kwamathuba emisebenzi,” kusho yena.
U-Ayanda uthi ukhulume noninalume, osebenzisana nabakwaBoxer ngokubafakela izitini zokwakha ukuthi bona bangakwenza kanjani lokhu.
Uthi kubathathe isikhathi esingaphezulu konyaka ukuxoxa neziphathimandla kulesi sitolo, okuze kwasayinwa izivumelwano ngoNhlangulana (June) wanonyaka. Isivumelwano sabo noBoxer sithi bazofakela izitolo eziwu-148 eNingizimu Afrika yonkana la malahle, kanti bathi lokhu kubaphoqa ukuba bakhuphule izinga lokusebenza njengoba lokhu kusho ukuthi kumele baqashe abantu kuphinde kwandiswe amalahle abawenzayo ngosuku.
Enye yezingqinamba abathi babhekene nazo njengamanje, wukungabi nemali yokukhulisa ibhizinisi njengoba bethi nasezinhlakeni zikahulumeni ezixhasa osomabhizinisi abancane, sebengqongqoze baze bakhathala.
“Njengamanje sibheka indaba yokuba sifune abantu abazotshala imali ebhizinisini, kodwa nakhona sisakhuluma nabanolwazi ukuthi lokhu singakwenza kanjani. Kakusona isinqumo esizosithatha kalula nje leso, kodwa futhi kasifuni ithuba esesilitholile lisiphunyuke ngoba sesehlulwa wumsebenzi,” kuqhuba u-Ayanda.
UThobani uthi leli thuba lokusebenzisana nesitolo esikhulu kangaka, yikhona vele abebekufuna ngoba kuzokwenza basheshe bafike lapho befuna ukuya khona nebhizinisi labo.
“Okuhle ngenkontileka yethu wukuthi kayinasikhathi. Uma nje sisenza amalahle, siyohlala sisiphakela lesi sitolo, ngisho kungathiwa leli bhizinisi silishiya ezinganeni zethu, nazo ziyoqhubeka lapho. Okunye wukuthi isibeka ezingeni elihle lokuthi singaqasha abanye abantu abangaze bafike ku-200.
“Kuyimanje sinabantu abawu-27 abaqashwe ngokugcwele, okuzophoqeleka ukuba lesi sibalo sisikhuphule,” kusho yena.
Uthi okwamanje basakhethe ukuqala kancane ukuze bakwazi ukuba nendlela yokusebenza njengoba besaqale ngezitolo eziwu-48 KwaZulu-Natal.
Uqhuba athi uma sebekwazi ukuziphakela zonke, bazobe sebedlulela kwezinye izifundazwe kuze kube bakwazi ukuphakela iNingizimu Afrika yonkana.
UZwelibonge uthi zibekhona izingqinamba abebebhekana nazo njengokuthi kusamele baqale bafundise abantu ababaqashayo umsebenzi, okuyinto ebuye idle isikhathi, kodwa ebalulekile ngoba umsebenzi wabo kumele ube sezingeni elihloniphekile.
Okuhle ngokuhlanganyela kwabo ebhizinisini, uthi wukuthi bakhule ndawonye futhi bangabangani, okwenza ukusebenzisana kube lula.
“Uma kukhona ukungaboni ngaso linye, siyakhuluma sidlule kukhona. Uma sinesinqumo esingakwazi ukuvumelana ngaso, siyavota ngoba sobane singabanikazi benkampani ngokulingana,” kusho yena.
U-Ayanda uneziqu zeCivil Engineering, uThobani noZwelibonge baneziqu zeMarketing kuthi uNdumiso abe nezeEnvironmental Studies.
Ngaphandle kwesivumelwano sabo noBoxer, baphinde baphakele izitolo ezahlukene eKokstad nasePort Shepstone namagaraji ngokunjalo.