AYANDA BUTHELEZI:
AMAGUGU aleli lizwe ayosala emathuneni. Leli ngelinye lamaculo avusa usizi ahutshwa emngcwabeni aphinde asikhumbuze ngamagugu nezingcithabuchopho esezalala kobadandayo.
Bekuthi uma kuculwa leli culo namanye afuzile, kube khona isizotha nokuthula kuhlonishwa isidumbu, kulilwa ngezinhliziyo kukhaliswana nomndeni wolahlekelwe, ukhunjuzwa ukuthi noma esehambile othandiweyo wabo kodwa uyohlale eligugu kubona.
Kunemikhutshana ebiyenziwa ukukhombisa ukuhlonipha amathuna, okuyindawo ebithathwa “njengengcwele” ukuhlonipha asebelele kuyona. Owesifazane ubengangeni engathwele ekhanda, bewungabangwa umsindo futhi bekungavumelekile ukuba uhambe phakathi kwawo (amathuna) uweqe kodwa bekumele uwakekele. Okunye uma ukhomba kakumele ulikhombe ngomunwe kodwa kumele ulikhombe sakufingqa ingqindi.
Yize singekho isiqinisekiso ngempilo kodwa iqiniso elimile ngayo wukuthi sonke siyogcina ethuneni, osekubiza ebomvu imali kulezi zinsuku ngenxa yokuthi imingcwabo isiphenduke inkundla yokubukisa ngotshwala, imfashini nomjuxuzo obizwa nge-after tears - ukuhambisana nempilo ebiphilwa yilowo osuke ebekwa kweyokugcina.
Lokho kakugcini ezihambelini nasemindenini esuke ingcwaba kodwa sekuyibhizinisi elihamba phambili ngisho kubangcwabi imbala. Sekunomqhudelwano wokokuhlobisa lapho amalungu omndeni ebekelwa indawo yokuhlala enokhaphethi obomvu noma oluhlaza, osofa abantofontofo, yizimbali neziphuzo. Baphinde batatanyiswe ngezimoto eziphambili.
Imindeni ibuye ithande ukufaniselana kube nombala wosuku abazogqama ngawo babuye baphathe izimbali abazozifaka ethuneni, bangatheli inhlabathi njengenjwayelo.
Ngisho namabhizinisi aphrintayo enza imali ngoba kwesinye isikhathi umndeni uyaye unqume ukugqoka izikibha ezinesithombe sikamufi. Sekuyivela kancane ukuba ubone kuhlangene omakhelwane bezoqoba bapheke njengoba sekudume ukusetshenziswa kwezinkampani eziphekayo (catering).
Kuqala bekuyaye kuthi uma kushoniwe emzini othile ubone abantu bengena bededelana beyolila futhi beyolekelela abavelelwe yisifo. Ubufica kukhona abatatazela nomdokwe, abanye bangene namabhakede amakhekhe, ujeqe abanye bezokhala ngamasaka emifino (vegetables) nokunye. Lokhu bekuwethula umthwalo kulowo mndeni osuke ubhekene nesikhathi esinzima sosizi.
Amadoda nawo abesondela abone lapho engalekelela khona njengomsebenzi wokuhlaba inkomo, nakweminye imisebenzi esindayo. Ngosuku lomngcwabo abeba matasa eqopha ithuna, amanye abe semabhodweni enyama.
Nakuba kwezinye izindawo kusekhona ukubambisana kodwa okucacayo wukuthi isimo kasisafani nakuqala. Kule mihla umndeni osuke ushonelwe sekuyiwona othwala kakhulu umthwalo, utatamisa labo abasuke bezokhala kunokuba kududuzwe bona.
Lesi sihloko sigqame kakhulu engqungqutheleni i-2nd Pan African Cemeteries and Crematoria ethathe izinsuku ezimbili e-Inkosi Albert Luthuli International Convention Centre (ICC).
Kule ngqungquthela bekubhekwe kakhulu izingqinamba ezibhekene nokushoda kwezindawo zokungcwaba osekuholele ekutheni kubhekwe ezinye izindlela zokubhekana nomthamo wokushona kwabantu njengokulothisa nokunye.
Kulokhu bekubuye kubuyekezwe ukuthi lezi zindlela kazinawo yini umthelela ongahlukumeza izinkolelo zabantu, ikakhulukazi abamnyama.
Kuhlalukile ukuthi ukungcwaba kuseyindlela eyamukelekile yokuvalelisa kosesishiyile emhlabeni kwazise kunemikhutshana imindeni eyenzayo eyisiko.
Ukuvuleleka kwezinye izindlela zokungcwaba kungase kube nezingqinamba ukuba leyo mikhuba ifezwe. Okugqanyiswe kakhulu wukuthi kubantu abamnyama, amathuna ayindawo “enobungcwele” futhi ehlonishwayo.
UNkz Veronica Masenya, oneziqu ze-Antropology and Sociology azithole e-University of Free State, ukhulume kabanzi ngocwaningo alwenzile olugxile kulesi sihloko wathi kunendlela abalele abadlulisa ngayo imiyalezo besebenzisa ithuna. Uthe uma ithuna libhodlokile kusuke kunokuthile okumele abomndeni bakusukumele.
Ubuye wachaza nangezikhathi lapho imindeni ihlangana khona yenza imikhutshana ethile ehambisana nabo uma bevakashele ongasekho ethuneni, nalapho befike balicentele khona benze neminye imikhuleko. Uthe sekufikisa ngamahloni okwenzeka emingcwabeni okukhombisa ukwehla kwenhlonipho kulezi zinsuku.
“Ufica umgengana umi uyizixongololo ezimotweni ngaphandle uziphuzela, abesilisa begqoke izikhindi futhi bengabi yingxenye yokugqiba umgodi. Uma sekuyisikhathi sokugqiba, kunalabo abajaha ukufika kuqala ekhaya beyoma kulayini wokuya ngasethunjini, bengalindi nokuba kufike kuqala umndeni.
“Kuyaye kuthi umndeni ubuya emathuneni bona basuke sebehleli ematafuleni sebedla, abanye bematasa beshutha izithombe ukuze bachome ngazo ezinkundleni zokuxhumana.
“Okuba buhlungu kakhulu wukuthi imvamisa baba yimbijana abasuke besemathuneni kunalabo abasuke sebemi kolayini belindele ukudla. Ngenxa yalezi zizathu nezinye, miningi imindeni ikakhulukazi kubantu abamnyama esala ikhandlekile emoyeni ngenxa yokungakutholi ukwesekwa ngendlela iphinde isale icwile ezikweletini,” esho.
UNkz Masenya ugcizelele ukuba ahlonishwe amathuna njengoba eyindawo elele amagugu abo futhi ayohlale eyingxenye yempilo yabo.