Kugqugquzelwa intsha ukuzigqaja ngamasiko ayo
Ufisa ukuba nesikhungo esikhulu esizobhekelela wonke umphakathi
UGQUGQUZELA intsha ukuba ithande amasiko uMnu Wonder Dlamini (35), ongumnikazi we-Izandla Zothando Foundation, okuyinhlangano engenzi nzuzo ezinze eMpendle.
UMnu Dlamini usungule le nhlangano ngo-2006, kodwa ize yabhaliswa ngokusemthethweni ngo-2011. Uthi lokhu ukwenziswe wukubona izimo eziningi ezahlukene ebezihlasela umphakathi waseMpendle namaphethelo.
Utshele ILANGA ukuthi bekungehli kahle kuyena ukubona kunezingane ezilala zingadlile, kunentsha esebenzisa izidakamizwa nabantu abakhulile abangakwazi ukunakekela imindeni yabo, kanjalo nezaguga abezibona zinganakekelwa kahle.
Yikhona lokhu okumenze waba nothando lokusebenzela umphakathi.
Uveze ukuthi ukuhlangana noDkt May Mkhize, oyinkosikazi kaNgqongqoshe wezeMpilo, uDkt Zweli Mkhize, kumfundise okuningi ngoba nguyena oze wamgqugquzela ukuba ayibhalise le nhlangano ukuze ezokwazi nokuthola uxhaso ezindaweni ezahlukene.
Njengamanje uMnu Dlamini uthi ngaphansi kwale nhlangano, uhlela umcimbi lapho kuzobe kuhlanganiswe khona intsha nabantu abadala, begubha inyanga yamasiko, kodwa akugcizelela kakhulu wukubaluleka kokuthanda nokuzigqaja ngamasiko entsheni.
Kulo mcimbi ozobe umhla ka-24 kuMandulo (September), ehholo lomphakathi iHlelolusha, eGomane Location, intsha izobe igqugquzelwa ukuba izihluphe ngokwazi kabanzi ngemvelaphi yayo.
Phakathi kwezidingo abaziyisa emphakathini ngaphansi kwale nhlangano, uthi banikezela ngemifaniswano yezikole nezicathulo ngoba bengafuni izingane eziphuma emakhaya ahlwempu, zizenyeze.
“Sinamavolontiya ahambela imiphakathi yaseMpendle namaphethelo. Sinamahhovisi edolobheni, kodwa isifiso sethu esikhulu wukwakha isakhiwo esigodini saseNhlabamkhosi.
"Lapha sihlanganisa abantu abadala bakhulume nangezinto eziyizingqinamba ababhekene nazo empilweni,” kusho yena.
Uthi kuphinde kube nohlelo lapho abantu abadala bedlala khona ibhola, bazijabulise.
“Isifiso sami esikhulu wukuba sibe nesikhungo esikhulu esizobhekelela wonke amalungu omphakathi ngokwahlukana kwawo, kusukela ezinganeni kuya kubantu abadala.
Kunendawo esizokwakha kuyona lesi sakhiwo esiyiphiwe yiNkosi Simphiwe Zuma esilekelele kakhulu. Njengamanje sisebenzisana namavolontiya awu-13 asebenza ngokukhulu ukuzikhandla,” kusho yena.
Ezinye zezingqinamba athi babhekane nazo ngesikhathi beqala le nhlangano, wukwanda kwesandulela-ngculaza, yisifo sofuba nokudliwa kwezidakamizwa yintsha.
“Siyakwenza okungangamandla ethu ukugqugquzela intsha ngokubaluleka kokuzigcina nokuzinakekela nokukhuthaza abanazo lezi zifo ukuba bazinakekele, baphile ngendlela ezokwenza impilo yabo isimame,” kusho yena.
Uthi njengoba bezogubha usuku lwamagugu nje, yingoba bafuna nokuvumbulula ithalente entsheni yasendaweni.
“Baningi abantu abasha esesivumbulule amathalente kubona, okuhlanganisa Izichwensi, uZothani, Amawundlu noSkhumbuzo Da Poet, okungabanye babantu esesike sasebenzisana nabo.
"Okunye esikufundisa abantu bakule ndawo wukuthi bangakwazi ukuphila ngamathalente abo futhi kabadingi ukuba baze bathuthe baye emadolobheni amakhulu," kusho yena.
Umcimbi uyobe wenziwa ngaphansi kwesiqubulo esithi "Yazi Imvelaphi Yakho”.
“Lapha silindele ukuba abantu abahambele lo mcimbi bavunule. Kuzobe kukhona nezicukuthwane ezahlukene, okuhlanganisa noMnu Bongani Mavuso, ongumsakazi woKhozi FM, uLungisani Hadebe ongumculi, iMeya yseMpendle, uMnu Sizwe Ndlela nomkhandlu wobukhosi bakwaNxamalala," kusho yena.
Uthi bazobe bekhuza nesihlava esihlasele iNingizimu Afrika sokudlwengulwa nokubulawa kwabantu besifazane nezingane. “Kuwona lo mcimbi sizophinde sikhulume nomphakathi ngeqhaza ongalibamba ekulweni nalesi sihlava.
"Lokhu bekwenzeka eMpendle phambilini, kodwa kusanqamukile, okungasho ukuthi sesiyoyeka ukukhuluma ngakho ngoba yisifo iNingizimu Afrika yonkana ebhekene naso," kusho uMnu Dlamini.
Kulo mcimbi kuzobe kungenwa mahhala kanti uMnu Dlamini ugqugquzela intsha ukuba iphume ngobuningi bayo.