SELUVULIWE USUKU LOKUBHALISELA UKHETHO LOKUCHIBIYELA
INHLANGANO eyengamele ukhetho eNingizimu Afrika, i-Independent Electoral Commission (IEC), isilumemezele usuku okuzoba khona ngalo ukhetho lokuchibiyela emawadini ahlukene komasipala bakuleli.
Lolu suku wumhla ka-6 kuLwezi (November) kanti azoba yisikhombisa amawadi okuzobe kuvotwa kuwona kuhlanganisa omasipala baKwaZuluNatal nabase-Eastern Cape.
Ukubhalisela ukuvota kuzovulwa kule mpelasonto esiya kuyona, ngoMgqibelo nangeSonto ngo-8 kuya ku-5 ntambama.
Ngokwesitatimende se-IEC, abasemawadini athintekayo kumele bayobhalisa ngomazisi babo, okuyilapho bezobe sebegcwalisa imininingwane eyahlukene ehambisana nezindawo abahlala kuzona.
Labo asebeke babhalisa ngaphambilini, banxuswa ukuyobheka amagama abo baphinde bawavuselele. KwaZulu-Natal ngaphansi kukaMasipala Umzumbe, kuvuleke isikhala ngemuva kokusula esikhundleni kwekhansela ku-ward 6.
Kuzobhaliselwa esikhungweni iMasiphathisane Creche, eSoyivo Primary, eMabheleni Community Hall, KwaTate Community Hall, e-Oetting Mission, ePhembukukhanya Primary nasenkulisa ebizwa nge-No.7 Creche. Ngaphansi kukaMasipala iMooi Mpofana, nakhona kwesule ikhansela lakwa-ward 4.
KuMasipala uMsunduzi kuvuleke isikhala ngemuva kokudlula emhlabeni kwekhansela ku-ward 33.
Kuwona futhi lo masipala, kuzobe kuvotelwa elinye ikhansela ku-ward 18 nalo futhi elidlule emhlabeni. Labo abavota ngokukhethekile bazovakashelwa emakhaya abo mhla ka-5 kuLwezi kusukela ngo-8 kuya ku-5 ntambama, kodwa kuthiwa kubalulekile ukuthi bafake isicelo salokhu ehhovisini eliseduze nabo lakwa-IEC.