Okuhle nokubi ngoRobert Mugabe
Iningi labaholi cishe kuwo wonke amazwe asuke ephuma phansi kwengcindezelo yemibuso yamazwe ase-Europe, kuye kuthi uma seliphethe amatomu ombuso lingabe lisafuna ukudeda uma ihlandla lokuphatha seliphelile ngokomthethosisekelo kulelo nalelo lizwe.
Lokhu kuvame ukuhambisana nokuthi lungabikhona ukhetho noma nxa kwenzekile lwaba khona, kube nesandla semfene kulona futhi amaqembu aphikisayo azithola ephansi kwengcindezi enkulu yokuwavala umlomo ngisho nangezenzo zodlame imbala.
Phakathi kwezinto ezinomthelela omkhulu wokungafuni ukugudluka esikhundleni sokuhola izwe, ukuzicebisa akuphuthi njengoba kusobala ukuthi uma iqembu eliphikisayo lithatha amatomu okuphatha, vele lisuke lizolandelwa wuphenyo ngengcebo anayo umholi ophumile esikhundleni.
Vele imali nemvelaphi yayo kosopolitiki, kungafani nakosomabhizinisi abajwayelekile, ivame ukuba yindlabeyiphika nento abayaye bangathandisisi ukukhuluma kakhulu ngayo - njengoba kubikwa ukuthi bekunjalo nangoMnu Mugabe.
Lokhu kufakazelwa wumbiko wephephandaba, iThe Guardian, mayelana nokuthiwa kwashiwo ngumkaMnu Mugabe, uNkk Grace Mugabe ngo-2014 esigcawini sabacosheli bezindaba. Kuthiwa wathi izindaba ezikhulunywayo ngokuthi umyeni wakhe ucebe ngokwedlulele, zingamampunge.
“Sibusisiwe ngoba sinobaba uMugabe, ungumengameli ohlwempu kunabo bonke omengameli emhlabeni,” kusho uNkk Mugabe. Isibalo nohlobo lwezindlu zikaMnu Mugabe okubikwa ukuthi ubenazo eZimbabwe nakwamanye amazwe, ngezinye zezinto ezihamba phambili.
Ngokombiko owaphuma mhla ka-17 kuLwezi (November) 2017 kwiThe Citizen, ngesikhathi uMnu Mugabe esanda kugudluzwa esikhundleni, lezi zinto ezilandelayo ngezinye abesenazo kule minyaka ewu-37 ebusa:
Umuzi kanokusho oseHong Kong olinganiselwa ku-R56 million, okuthiwa uthandwa kakhulu ngumkakhe;
Kube yilowo oseZimbabwe olinganiselwa ku-R136 million, owethiwe igama lawo ngesithakazelo sakhe esithi Gushungo kanti ubuye uteketiswe ngelithi Blue Roof. Wona-ke usho ngamakamelo okulala awu-25, yidamu lokubhukuda, indawo yokudlela engahlalisa izivakashi ezingaphezulu kuka30, nekamelo elikhulu lokulala elinobuchwepheshe be-radar system obadla imali elinganiselwa ezigidini zama-dollar ase-USA;
Umhlaba onamapulazi olinganiselwa ku-15 000 hektha awudla ngo-2000 kubalimi abamhlophe, okuthiwa amanye alawo mapulazi wawaphendula izindawo zakhe zokuphumula;
YiMercedes Benz eyakhelwa yena ngokuyisipesheli eGermany, ngokulandela imiyalo yakhe ngezinto afuna ibe nazo, okwadla u-R16 million. Kuthiwa ikuvikela ngisho udutshulwa ngezinhlamvu ze-AK 47 imbala; uma ukuyona uyasinda ngisho nasemabhomini esandla (hand grenades). Isho ngomshini odlala ama-CD, amaDVD, yi-internet nokuvimbela ukulalelwa okungagunyaziwe uma ekhuluma;
YiRolls Royce Phantom engeyekhethelo, kangangoba kuthiwa ziwu-18 kuphela ezikhona emhlabeni jikelele. Akwaziwa ukuthi iRolls Royce Phantom IV kahulumeni ebisetshenziswa nguye yona yadla malini;
Yindandatho ka-R18 million okuthiwa uNkk Mugabe waze wamangalela usomabhizinisi waseLebanon ngokuhluleka ukuyithumela kuyena, okusolwa ukuthi yayithengwe njengesipho esivela kuMnu Mugabe sokugubha iminyaka ewu-20 beshadile;
Amadodana akhe uRobert Junior noChatunga, kubikwa ukuthi babekhokhela ifulethi isizumbulu sika-R500 000 ngenyanga eDubai, e-United Arab Emirates ngaphambi kokufudukela eNingizimu Afrika lapho bebehlala khona efulethini abaliqashile eRevonia, bekhokha irenti ka-R70 000 ngenyanga.
Kwaze kwaba lapho bexoshwa ngesixakaxaka sokulwa esadaleka kudliwe amanzi amponjwana. Kubikwa nokuthi ngolunye usuku ethokozile uChatunga, wabonakala kwi-video efake iwashi lakhe elinamaqhuqhuva edayimane okuthiwa walithengelwa nguyise ngo-R850 000 - elithela ngewayini i-Ace of Spades elibiza u-R37 00 ibhodlela;
NaseZimbali, enyakatho yeTheku, kubikwa ukuthi ikhona indlu kaMnu Mugabe okungenasiqiniseko ngentengo yayo, okwake kwahlawumbiselwa ukuthi uyothathela kuyona umhlalaphansi.