ONEMBEZA BABAPHETHE IZWE SEBE-BEYOND REPAIR
E-MANY Cannibals Afrika izinto zimane ukwenzeka dadewethu kababa, ngimfunge uVuyiswa nezihlathi zakhe ongafunga ukuthi zazakhiwa ngumama obhaka amagwinya!
UMnu Thabo Mbeki, lo owayengumengameli ngaleya minyaka yamaThusong Centre, ubeKwaMchunu-Natal okokuqala selokhu adliwa yizembe kwesokuba ngumengameli wezwe ngo-2008!
Singobani-ke thina bo-Emeritus Rev, Achbishop, Dr, Prof, Adv Mkhekhelezi ukuhamba amalombo sengathi yijuba likaNowa! Cha bazalwane, bengithi ake ngivele nje okwanamhlanje kuphela bese ngibuyela emgodini wami njengesigcilikisha.
Ngisukunyiswa yile ndaba yokuhlaselwa kwabantu bokufika nokuhlukunyezwa kubulawe abesifazane. Lafa eli-beautiful, uSathane ugqoke ama-qhoks, uyamodela. Ngiyazi-ke ukuthi engizokukhuluma la, kungase kuholele ekutheni ngifele ubala njengoShwi noMtekhala, ngoba abantu baseMany Cannibals Afrika neqiniso ngumJuda nomSamariya.
Bakwethu, ake siyeke ukucabanga ngo-reverse gear kodwa sifuna ukuya phambili, udlame kalukaze lube yisixazululo. Njengoba nishaya abantu bokufika nje, nicabanga ukuthi kuzonisiza ngani lokho? Indlela yokuxazulula izinto iyodwa noma zimbili, votelani uRev Mkhekhelezi, uzoshintsha yonke into, iphele indaba yokulokhu siqhoshelwa ngokuthi laba bantu babesikhoselisile ngesikhathi sizabalaza. OZabalazani noNomzabalazo yibona laba abona izinto.
Babebhacisiwe kula mazwe, ngabe nabo babedayisa izidakamizwa?
Kubi nje ngoba sekuhlukunyezwa nabantu bakomalume eMozambique bezidayisela imishanelo yesundu namabhodwe ngenxa yabantu abadayisa izinto ezinkulu o-mandrax no-caffeine… hhayi man, i-cocaine.
Esinye isixazululo, ake sicele uMengameli Cyril Ramaphosa asibuzele nje kumengameli waseZimbabwe, Nigeria, Congo, etc ukuthi abantu babo baze bagcwale kwamanye amazwe nje, kunezimbungulu yini emazweni abo?
Yibona laba baholi abagcina sebenemilomo emide ngathi yile nyoni okuthiwa yincwincwi, begxeka uhulumeni wethu ngokungenzi lutho uma kuhlaselwa abokufika. Wukuthi nohulumeni wethu uthambe too much sengathi yibhotela elizile i-fridge.
Nakuyo le yokuhlukunyezwa kwabesifazane, lo hulumeni wethu uyophaphama seliyoshona njengesidakwa esiye enkundleni sithi siyobuka iKaizer Chips neOrlando Pirates, saphaphama abantu sebejabula, umdlalo usuphelile.
Umuntu wesilisa obeka owesifazane isandla, yinkinga leyo esidinga bonke osayizi besipanela. Yinto eyaziwayo ukuthi abesifazane bangakhuluma, bakuthuke usuka eGoli uze uyongena eThekwini, manje kusho ukuthi bashaye?
Suka eduze kwakhe ubuye esebohlile, banothando laba bantu!
Nale nto-ke yabantu abafuna udumo koTwitter noFacebook besibiza ngoNot All Men Brigade, abasimele kancane neziNgisi zaseSylomu la kuhlala khona abantu abagula ngengqondo, thina sazi i-IFP Youth Brigade ne-IFP Women’s Brigade hhayi iNot All Men Brigade.
Kangisho-ke ukuthi i-ANC Youth League ne-ANC Women’s League kasibazi, phela laba bantu bepolitiki banesikhwele somfazi wasesithenjini onohlanga lokuthakatha.
Mina elami lithi, bantu besifazane, niyabona ukuthi amadoda yiwona aphethe izwe futhi avotelwa yinina? Kungani ningake nje niqoke owesifazane oyedwa, nimvotele nonke bese nishaya imithetho ezonivikela?
Phela onembeza babantu besilisa abaphethe izwe sebebeyond repair, yingakho nje bevuna izigebengu. Isigebengu sibulala umuntu wesifazane kusuke amadoda amaqembu enu athi gqokani izikibha zawo niyobhikishela ukuthi umbulali angayitholi ibheyili.
Ngiyanincenga-ke, okhethweni oluzayo, votelani umuntu wesifazane, kungenjalo, lesi siqhoqho samadoda enisifaka ezikhundleni, sizoqhubeka nokushaya imithetho yethoyilethe lomgodi.
Uma ekhuluma laphaya ephalamende, aye athi kumele amadoda alungise onombeza bawo. Uyilungisa kanjani into eseyahlula uJesu noShembe be-combined?
Angithi abanye balaba bantu besilisa bahlubuka ekubeni ngamaNazaretha, bayoba ngamaKhatholika, bayasuka lapho baba yiZayoni, manje sebengabafundisanyana ngaphansi kwalo mfundisi okuthiwa uthosa i-Omo waseNigeria okumanje ubhekene namacala asabekayo athinta ukuzithathela isinene ngendlovuyangena!
Sengihleba-ke nani bantu besifazane, yekani ukushiya amadoda enu nilokhu nithi nivakashela uHappiness noma uJoy kwamakhelwane kanti niyofuna injabulo kubaba wakwamakhelwane.
Ufune injabulo kuze kuqhamuke uJabulani! Yimbi leyo bazalwane, yiyekeni.
Cha, bengibuyele nje ukuzokhuza laba bantu abangcolisa izwe lethu ngalezi zigameko ezenza igazi lihambe ngesivinini somnenke.
Ngizwe-ke kukhona abangigxekayo ngale nkulumo, umuntu ngiyomkhahlela ngempama aphathwe yi-pneumonoultramicroscopicsilicovolcanoconiosis.
Uma esinde lapho uyovuka neshiphalytes, ibhabhalazi lomshipho.
Hikhensile ngopfu ma-Afrika