Bafuna ukusikhiphela komakoti isibhongo
Isebuhlungu inhliziyo yomqeqeshi othole impama
UMQEQESHI weKwaDabeka Sporting ufuna ukukhiphela isibhongo kwiZululand Warriors engomakoti bakulesi sigaba abazovovana inkani nayo koweSafa KZN ABC Motsepe League ngoMgqibelo ngo-13h00 eSugar Ray Xulu Stadium, eClermont.
UThami “TV” Ngubane ocija iSporting, unikwe isibhaxu esinzima sika-5-0 yiSummerfield Dynamos koweNedbank Cup ngeledlule, okwenza afune ukuguqula lo mphumela ngokuzishayela iWarriors kwazise ugijima ekhaya.
Lo mqeqeshi ogabe ngesipiliyoni sokulolonga emazingeni aphezulu, uzimisele ngokusebenza kanzima ukukhuthaza abadlali ukuze babuyelwe wukuzethemba.
“Ngisayiphemba ikilabhu njengoba ngisafunda abadlali. Le kilabhu inabadlali abahle. Okumqoka kimina wukulungisa imiqondo yabo, babuyelwe wukuzethemba. Ngeke kube wumdlalo olula neWarriors. Okubi nje wukuthi kasiyazi kahle ukuthi iphethe abadlali abanjani,” kusho uNgubane.
Uqhube ngokuthi akalilahlile ithemba lokunyukela phezulu kwazise uma uqeqesha kulesi sigaba usuke ulwela ukunyuka kuphela.
“Zikhona izindawo engibona sengathi kumele ngizilungise ngaphambi kokuya kulo mdlalo. Kangiboni kungangisiza ukusayinisa abadlali abasha kulesi sikwati enginaso.
“Kumele ngilungise ukuzethemba kwabo. Kubadlali engibona kunesidingo sokubasayinisa ngabaneminyaka engaphansi kwewu23 ubudala abangakwazi ukumelana nalesi sigaba,” kusho uNgubane.
ESugar Ray Stadium: KwaDabeka Sporting vs Zululand Warriors 13h00. Durban FC vs X1 Experience 15h00.
GWP Friends vs Rainham Sporting 15h00.
15h00.
Milford vs Natal United
Happy Wanderers vs Qwabe United 15h00.
Muzi King Masters vs UMvoti FC 17h00.