KUXOSHWE ABANQOBE ICOCA COLA U/15
INKOHLAKALO egubuzele ibhola lezikole KwaZulu-Natal iholele ekutheni kugcine kuqokwe iMasibambisane yaseFolweni ngaphansi koMlazi District ukumela lesi sifundazwe emidlalweni kazwelonke yeCopa Coca Cola U/15 Cup eqala namuhla ngoLwesine eKing Zwelithini Stadium, eMlazi.
Le midlalo izosongwa ngoMgqibelo. IMasihambisane yasemaJuba edle ubhedu ngesikhathi kukhishwa ingqwele yaKwaZulu-Natal, iphuciwe igunya lokudlala ezingeni likazwelonke ngemuva kokuba kutholakale ukuthi lesi sikole besipike inqwaba yabadlali.
Isikole saseHarry Gwala esidlale neMasihambisane kowamanqamu, obese kuyisona ebesizomela isifundazwe, naso kutholakale ukuthi sigubuzelwe yimikhonyovu esabisayo. Eqinisweni nje, zonke izikole ezidlale imidlalo yama-semi final bezinogcobho, okuphoqe ukuba kuqokwe iMasibambisane nayo okuthiwa kunomdlali obengaqondakali, kodwa okhishwe ngaphambi kwemidlalo yesifundazwe.
USmanga Mgenge ongunobhala weSasfa KwaZulu-Natal, uthi ukufika kwezikole ngosuku lwemidlalo, yikhona okwenze zenza imikhonyovu.
“Siyaye sikhuthaze ukuthi izikole zifike kusasele usuku kuqale imidlalo. Inkinga wukuthi kasinayo imali yokuzilalisa ukuze sikwazi ukuzihloma imibuzo. Sithathe isinqumo sokuhambela izikole ngemuva kokukhishwa kwezingqwele zesifundazwe. Kulapho sihlonze khona yonke le nkohlakalo.
“Kwesinye isikhathi ubuza unozinti ukuthi bangaki abadlali afunda nabo ekilasini abadlala emuva, abagagule ngamagama, kodwa nxa usufika esikoleni ubabuza, kuvele ukuthi bonke kabafundi ngisho kuleso sikole,” kusho uMgenge.