ISIKHULU SEBUCS SIBHEJE NGOGABUZA
UBHOBOKA ngokwenze wadedela uThamsanqa “Gandaganda” Gabuza wajoyina iSuperSport United uSihlalo we-Orlando Pirates, u-Irvin “Iron Duke” Khoza.
UKhoza uthuse abathandi bebhola ememezela ukuthi iPirates idedele uGabuza wajoyina iSupersport. Usayine iminyaka emibili nale kilabhu yasePretoria.
UKhoza udedela uGabuza nje, uke wakubeka kwacaca kuleli phephandaba ukuthi lo mdlali ngeke ahambe kwiBucs ngenxa yothando analo ngaye. Wathi umthandela umoya wobumbano alutshala ekilabhini nokuzinikela kwakhe edlala noma engadlali.
Ekhuluma neLANGA izolo uKhoza, uveze isizathu esenze wamdedela uGabuza.
“Okokuqala engifuna ukukucacisa wukuthi uGabuza akaxoshwangwa kwiPirates futhi akahambile, kufana nokuthi usavakashile ngoba iminyango iyohlezi ivulekile kuyena lapha kwiPirates.
“Abadlali abanjengoGabuza bayivela kancane, uwuhlobo olwehlukile, ongeke uluthole ndawo, ngakho-ke kawukwazi ukuxosha umuntu onjalo.
“Ushiye imbobo lapha kwiPirates ngoba ubewufaka umoya wokuzwana, ozakwabo bayamkhumbula. Kodwa-ke ngenxa yokubona ukuthi iminyaka yakhe yobudala iyahamba, ngihlalile naye savumelana ukuthi akavakashe ngoba izinto kazimhambeli kahle ekilabhini.
Bengingathandi ahambe kodwa ubengasizakali ngoba ubengadlali.
“Kakusizi ukuba nomoya omuhle kodwa ube ungadlali, yingakho nginqume ukuba ngimyise kwiSuperSport. Sibe nemihlangano eminingi naye ngoba bekunamakilabhu amane abemfuna, ngabe senginquma ukumyisa kwiSuperSport. Konke ukwenzelwe yimina ngibe yi-agent yakhe yize-ke ngibe yile agent engaholi,” kusho uKhoza.
Uqhube ngokuthi ujabule ngefomu yakamuva kaGabuza.
“Ngijabule ngendlela eyisimanga ngendlela aqhulula ngayo amagoli kwiSuperSport. Bengivele ngazi ukuthi uzowaqhulula amagoli, yingakho ngibheje nemenenja yeSuperSport uStan Mathews. Ngeke ngikutshele ukuthi sibhejeni kodwa ngendlela uGabuza enza ngayo sekusele kancane ngiwine kwesikubhejele.
“Ngijabule ngendlela engachazeki ngendlela enza ngayo. Ngiyezwa ukuthi nakwiSuperSport uyangungwa, wonke umuntu ufuna ukuba seduze kwakhe ngenxa yomoya awutshalayo kubadlali.
“Ungicasula kabi umdlali okuthi uma engadlali aquve, atshale umoya wezikhova kozakwabo. UGabuza akanjalo-ke, yena uma engadlali ufaka umfutho kozakwabo yingakho eyohlezi enendawo kwiPirates ngisho eseliyekile ibhola,” kusho uKhoza.