Igaya izibozi inhliziyo yoxoshwe wuSuthu
Uthi kunezimpahla azozilahla, ezimlandele amashwa
IYANSONSOTHA inhliziyo yomqeqeshi oxoshwe ngamaZulu FC njengoba ekholwa wukuthi le kilabhu kayizange ibenze ubulungiswa. USuthu lukhombe indlela uCavin Johnson ngoMsombuluko obesehlale amasizini amabili agcwele kule kilabhu. Uxoshwe ngesizathu sokugqoza kwemiphumela emihle kule kilabhu.
USuthu yilona olubambe ibhuleki emsileni we-log ngamaphuzu amabili emidlalweni ewu-5. USuthu luqashe uJosef Vukusic waseSlovakia oshiye umsebenzi kwiPolokwane City ekupheleni kwesizini edlule ekhala ngokuthi isimo sakhe sempilo kasisihle.
UVukusic wethulwe ngokusemthethweni kwabezindaba yile kilabhu izolo ngoLwesithathu ntambama emcimbini obuseMoses Mabhida Stadium, eThekwini.
UJohnson ekhuluma naleli phephandaba izolo ngoLwesithathu ekuseni, uthe iyansonsotha inhliziyo yakhe ngendlela axoshwe ngayo oSuthwini.
“Ukuxoshwa yinto yethu kodwa lokhu okwenzekile bengingakulindele, futhi nendlela olusingathwe ngayo udaba lwami kayingiphathanga kahle. Kangifuni ukukhuluma izinto eziningi kodwa bengingakulindele ukuthi ikilabhu engiyisize yavika izembe ingangiphatha ngale ndlela eyenze ngayo. Kuyizinkomba zokuthi bangabantu abangabongi. Nokho kakusenani, impilo iyaqhubeka,” kusho uJohnson.
Limbuza leli phephandaba ukuthi ngabe akhona yini amakilabhu aseke amthinta ngenhloso yokumqasha, uthe:
“Okwamanje kayikho, ngihleli ekhaya, ngisapholisa ikhanda. Ngisathulula imithwalo yami engibuye nayo eThekwini. Ngikhetha engizoqhubeka nokuyisebenzisa nengizoyilahla engikholwa wukuthi inamabhadi.” Uthe uyifisela inhlanhla le kilabhu kukhona konke.