Owo Suthu a kayesabi iChiefs
Uthi uyigobe inkani esacija iPolokwane City ngesizini edlule
KUBUKEKA ezihenge ngokwakhe uJozef Vukusic waseSlovakia, ongumqeqeshi omusha wamaZulu FC ozovula kulesi sikhundla ngomdlalo onzima neKaizer Chiefs ngoLwesibili oluzayo ngo-15h00 kowe-Absa Premiership, eKing Zwelithini Stadium, eMlazi.
USuthu lukhombe indlela uCavin Johnson ngoMsombuluko ngemuva kokudlala imidlalo ewu-5 ngaphandle kokunqoba. Ethulwa kwabezindaba izolo eMoses Mabhida Stadium, eThekwini, u Vukusic, wenze isethembiso okubukeka kuzokuba nzima ukusifeza njengoba ezibophezele ekujikeni isimo ngokushesha kule kilabhu okumanje isemsileni we-log ye-Absa Premiership.
Uthe okumqoka kuyena wukuqoqa amaphuzu emidlalweni ezayo ukuze le kilabhu izoxaxama ngokushesha emsileni. Okunzima kakhulu kulo mqeqeshi wukuthi uzohlala okokuqala ebhentshini loSuthu uma seyibhekene neChiefs ehleli esicongweni se-log.
Uthe uyakuqonda ukuthi kumele abeke ikilabhu endaweni enesithunzi, kodwa okuhle wukuthi uzosebenzisa isikhathi sekhefu leFifa ukubhekana nokulungisa ikilabhu. Uthi ikilabhu izokwazi ukudlala ibhola elihle. Uthi uyakuqonda ukuthi izibalo kazimvuni nhlobo, kodwa uzozama ngawo wonke amandla. Uthi (namuhla ngoLwesine) uzobonana nabadlali, okuhle wukuthi abanye uyabazi ngoba useke waqeqesha kuleli. IChiefs iqhwakele kwi-log, futhi kuyaziwa ukuthi ihlale izenzela umathanda uma ibhekene noSuthu. Nokho uVukusic uthe iChiefs kayikaze imnike inkinga esekwiPolokwane, uyazi kahle.
Lo mqeqeshi obecija iPolokwane City ngesizini edlule, ubonge uSuthu ngokumbuyisa ebholeni laseNingizimu Afrika. IPolokwane ibibalwa namakilabhu angagayelwa mphako ngesizini edlule ngaphansi kobuholi bakhe, okuholele ekutheni kusongwe isizini ikwi-top 8.
Sekuwumlando ukuthi iPolokwane ikhishwe yiHighlands Park kwi-semi-final yeMTN8 sekukhahlelwa amaphenathi emlenzeni wesibili ngoLwesibili. ULunga Sokhela, oyisikhulu soSuthu, uthe kabafuni ukufaka umqeqeshi ngaphansi kwengcindezi, okumqoka abakudingayo wukushesha ukujwayela abadlali nekilabhu.
Uthi okunye bazokubona uma siqhubeka isikhathi ngoba yisebholeni. Uthi bonke kumele basebenze ngoku-phindiwe ukubeka ikilabhu esicongweni.
Uthi kumele bamnike isikhathi ngoba okunye okumqoka kumqeqeshi wukukhuphula abadlali abancane. Lo mqeqeshi uzosizana noMabhuti Khenyeza noDavies Phiri ocija onozinti.