Ubulale inyanga emdayisele umvusankuzi ongasebenzi
KUBOSHWE abafundi abawu-9 ngokushisa nokucekela phansi impahla kubhikishwa eDurban University of Technology (DUT) izolo.
Abafundi ababoshiwe bahlasele unogada oneminyaka ewu-27 ubudala, osebenza kulesi sikhungo, bamshaya, bemthela ngophethiloli bethi bazama ukumshisa. Lo nogada kuthiwa usindiswe ngozakwabo bamphuthumisa esibhedlela.
Laba bafundi baseDUT babhikisha nje, bathi sebekhathele wubugebengu obenzeka kulesi sikhungo kube kukhona onogada abaqapha ubusuku nemini. Kabagcinanga ngokuzama ukushisa unogada, baphinde baphihliza nempahla okuhlanganisa nezitolo zalabo abakhe eduze nalesi sikhungo.
Lokhu bekwenzeka eSteve Biko Campus, eThekwini. Kuzokhumbuleka ukuthi ukufunda bekumele kubuyele esimeni ngeledlule ngemuva kokubulawa kukaMnu Sandile Ndlovu, ogwazwe wabulawa ngaphakathi esikoleni.
Omunye wabafundi okhulume neLANGA, ocele ukuba igama lakhe ligodlwe, uthe bakhathazwa wukuthi izikhulu kazenzi lutho yize sekukhona umfundi obulewe. “Sizibona singaphephile nhlobo, okusenza sesabe ukuba sesikhungweni,” kusho lo mfundi.
UMnu Lindani Zungu, oyisekelamengameli lomkhandlu omele abafundi, uthi okwenza abafundi baze babhikishe, yizigameko zakamuva zokubulawa kwabantu ngaphakathi esikhungweni.
“EMidlands, kufe umfundi ngaphakathi naseThekwini kwafa omunye umfundi ngaphakathi ngoba onogada abasebenza kusona kabawenzi umsebenzi wabo ngendlela, babheka amakhadi abafundi okungena kuphela.
"Kababakhuthuzi abangenayo ukuthi baphethe ziphi izikhali eziyingozi. Abafundi bafuna ukuzizwa bephephile uma bengaphakathi esikhungweni,” kusho uMnu Zungu. Esitatimendeni esikhishwe yiDUT izolo ngoLwesithathu, izikhulu zesikhungo ziveze ukuthi bese kunezinsuku eziwu-8 umbhikisho waqala, sekuze kwadlula emhlabeni nomunye wabafundi.
“Lesi sekube yisikhathi esibi kakhulu nesinethemba lokuthi sizodlula maduze njengoba sesiqalile sizama ukuthola nenkampani yonogada ezoqashwa ngokushesha,” kusho isitatimende.
Okhulumela amaphoyisa KwaZulu-Natal, uCapt Nqobile Gwala, ukuqinisekisile ukuboshwa kwabafundi abaphakathi kweminyaka ewu-20-30, wathi bazobhekana necala lokuzama ukubulala nokucekela phansi impahla.
Abasolwa uthi bazovela eNkantolo yeMantshi yaseThekwini maduze. Uthi kumanje isimo sisazinzile njengoba kutshalwe amaphoyisa ukuba aqaphe isimo kulesi sikhungo.