UNESICELO KWABASE-KZN NGORHULANI
Unxusa abalandeli baKwaZulu-Natal ukuba bameseke
USIHLALO weOrlando Pirates, u-Irvin “Iron Duke” Khoza ucacisa ngesizathu esenze waqasha ngokugcwele uRhulani Mokwena njengomqeqeshi wale kilabhu enomlando ohlonishwayo ebholeni lase-Afrika jikelele. IBucs izobhekana neBidvest Wits kowe-Absa Premiership ngoMgqibelo ngo-20h15 eMoses Mabhida Stadium, eThekwini. IBucs iya kulo mdlalo nje, ngeledlule ithole iwini yayo yokuqala ngaphansi kobuholi bukaMokwena ongumqeqeshi omncane kunabo bonke kwi-Absa Premiership njengoba eneminyaka yobudala ewu-34. Engxoxweni ekhethekile uKhoza abe nayo naleli phephandaba izolo ngoLwesithathu ekuseni, ugeqe amagula ngesizathu esenze wanika uMokwena lo msebenzi ngokugcwele.
“Kanginalo ngisho oluncane uvalo ngokuqasha ngokugcwele uMokwena kulesi sigqiki ngoba ngiyawazi amagalelo akhe. Wenze omkhulu umsebenzi engumsizi womqeqeshi.
“Nokho isizathu okuyisona esingenze ngaphephela kuyena wukuthi uMilutin Sredojevic usizumile eshiya, kwaba nzima nakimina ukuthungatha umqeqeshi ngoba isikhathi bese sihambile.
“Ngaphandle kwalokho, nomqeqeshi ebengimcabanga ubesenozinzo ekilabhini yakhe ngakho-ke bengingeke ngiqale phansi ngiphazamise amanye amakilabhu.
“Sizoqhubeka noMokwena size sibone ukuthi usibeka kuphi. Kufanele sikhumbule ukuthi nomqeqeshi ohambile ubemethemba, nguyena osiyalele ukuba simulande kwiMamelodi Sundowns.
“Njengamanje ngigculisekile ngomsebenzi awenzayo futhi ngeke silengeze ithimba labaqeqeshi okwamanje,” kusho uKhoza.
Limbuza leli phephandaba ukuthi ngabe ukhona yini umbandela ambekele wona, uthe:
“Kawukho umbandela engimbekele wona, ngabe ngenza iphutha elikhulu, ngabe ngimfakela ingcindezi engenasidingo uma ngingambekela umbandela. Kufanele azame ngazo zonke izindlela ukuthi ikilabhu yenze kahle. “Njengoba efika nje, kuzomthatha isikhathi ukufaka ulwazi lwakhe nebhola afuna lidlalwe yingakho singeke simtatazelise, ngizomyeka nje enze umsebenzi wakhe ngendlela afisa ngayo,” kusho uKhoza. Ube esenza isicelo kubalandeli baKwaZulu-Natal njengoba iBucs izodlala kulesi sifundazwe. “Ngiyazi ukuthi iPirates ithandwa ngendlela eyisimanga eKZN. Ngakho ngiyacela ukuba abalandeli baphume ngezinkani ukuzoseseka. “Ngiyabacela futhi ukuthi bamnike ithuba umqeqeshi, bameseke kukhona konke ngoba unalo ulwazi lwebhola. Kangingabazi ukuthi uma bezomeseka kukhulu azokwenzela ikilabhu,” kuphetha uKhoza.