I-NATU IPHAKAMISA UHLELO LOKUMAKA
I-NATIONAL Teachers Union (Natu), iphakamise ukuthi kube nohlelo olusha ekuqokweni kothisha abazomakela umatikuletsheni, olungasiza ukulwa nenkohlakalo ebhokile ekuqokweni kwabamakayo.
UMengameli weNatu, uMnu Allen Thompson ( osesithombeni), uthi kumele umnyango wezemfundo ubeke eqhulwini othisha abakhiqiza u-100% ezifundweni abazifundisayo - kubalwa nokuphasa ngamalengiso kwabafundi kulezo zifundo.
Uthi uhlelo olusetshenziswa y o njengamanje kalunabo ubulungiswa kwabanye othisha abasebenza kanzima, bangakuhlomuleli lokho.
“K u nothisha abasebenza ngamaholide nangezimpelasonto, kodwa kabakuhlomuleli lokho. Sifuna babhekelelwe ngokwehlukile ngomsebenzi wabo ngoba imvamisa abanye othisha bayakubalekela ukufundisa umatikuletsheni uma kuqala unyaka, kodwa ekupheleni kwawo bonke abantu bafuna ukuyomaka ngoba nakhu kuholwa ngakho,” kusho uMnu Thompson.
Ukhuluma kanjena nje, kuyaqalwa ukumakwa kwamaphepha kamatikuletsheni namhlanje ngoMsombuluko ezikhungweni eziwu-27 KwaZulu-Natal.
Abaqokelwe ukumaka kulesi sifundazwe bawu-8 342.
UMnu Thompson uthi emuva kokuba sebeqokiwe abazoqokwa ngalolu hlelo eluphakamisayo, bafuna kuthathwe u-30% wothisha abangakaze bawenze lo msebenzi nabo banikezwe ithuba ukuze bazikhulise.
“Uma kumakwa amaphepha kusuke kubhekwa yonke imizamo ingane eyenzile ngesikhathi iphendula imibuzo, okuyinto esingayenzi ezikoleni. Lokho kungenza nokuthi izinga lokufundisa kwabantu ababuya kulesi sikhungo sokumaka lishintshe kakhulu,” kusho uMnu Thompson.
Uthi lolu hlelo lungakhuthaza kakhulu ngisho othisha abahudula izinyawo emsebenzini, kwazise ngeke baqashwe ukuyomaka uma umsebenzi wabo ungagculisi.
“Kuyamangalisa ukuthi ezikhungweni zokumaka sekukhona ngisho othisha abafundisa ezikoleni zamabanga aphansi nezingane ezifunda emakolishi, okuyinkohlakalo enkulu leyo. Abanye othishanhloko basayina izincwadi ezingekho emthethweni eziqinisekisa ukuthi uthisha othile ufundisa umatikuletsheni ukuze athole itoho lukuyomaka ngoba nakhu kungumngani wakhe,” kusho uMnu Thompson.
Okwamanje umnyango wezemfundo uqoka uthisha osefundise iminyaka emibili kumatikuletsheni, ubheka ukuthi uthisha umejile yini ngaleso sifundo afake isicelo sokusimaka nokuthi ubeyingxenye yini yama- workshop abeluleki balezo zifundo.
Njengoba kuqalwa namhlanje ukumaka, othisha abangama- senior marker bawu-1 334, ama- deputy chief marker awu-191, abazobheka ukumakwa kwamaphepha ngaphakathi bawu-1 194, amachief marker awu-74.
UNgqongqoshe wezeMfundo eyisiSekelo, uNkk Angie Motshekga, uzomemezela imiphumela kamatikuletsheni mhla ka-7 kuMasingana (January) bese abafundi beyithola mhla ka-8 kuzo zonke izifundazwe.