Ufele ukusiza udadewabo ebhaxwa "wusbali"

Kuthiwa bebesanda kuthandana

UYAVEVA umphakathi waseNtshawini, KwaDukuza ngowesilisa odubule wabulala usibali wakhe ngoMgqibelo ngoba kade emkhuza eshaya udadewabo.

Kuyimanje ugcwele izintaba lo msolwa - esingeke simdalule ngenxa yokunqindwa wumthetho - okuvela ukuthi uze ubulala uMnu Siphiwe Khanyile (32) nje, bekuwumkhuba wakhe ukushaya udadewabo kamufi, uNkz Zamanguni Khanyile.

ILANGA lithole ukuthi umufi ubulawa nje, ubenezinsuku ezimbili efikile kubo, kwazise unomuzi wakhe eThembeni, khona KwaDukuza.

Kuthiwa ufice umsolwa ebhonya udadewabo, okuthe uma esondela wavulela ngenhlamvu washonela endaweni yasigameko.

UMnu Sphamandla Khanyile, ongumfowabo kamufi, uthi isimo sibi kakhulu kudadewabo njengoba evaleke amehlo emuva kokushaywa kanzima ngumsolwa. Uthi udadewabo ubesephenduke ibhola likamsolwa, emshaya njalo. Uthi uyacabanga ukuthi naye umfowabo ufike ngoba esezwile ukuthi umsolwa uhlukumeza udadewabo.

“Umfowethu ufike udadewethu engekho elapho ehlala khona. Uyile kuyena wamfica ehleli nomunye wesifazane. Ube esebona nalona wesilisa, wambuza ukuthi kungani ehlukumeza udadewethu. Ube esehamba waya kwenye indawo eseduze yokucima ukoma, ngesikhathi esebuyela endlini kadadewethu, umfice engasekho.

“Uphumile wambheka eduze nasendlini yakhe. Esambheka, uzithele kumsolwa eshaya udadewethu. Umfowethu umtshele ukuthi makamyeke. Kuthe esesondele kuyena, wadonsa isibhamu wamdubula esifubeni wawa,” kusho yena.

Uthi lesi sigameko siwuhlukumeze kakhulu umndeni, ikakhulukazi udadewabo obonile kubulawa umfowabo phambi kwakhe.

“Lo mfana ubesanda kuthandana nodadewethu kodwa indlela abemhlukumeza ngayo, ixakile. Kuyimanje kasazi nokuthi sizofihla ngani njengoba nomama esanda kushona. Ngizovuka nje kusasa (namuhla) ngiyozama usizo ukuze sizokwazi ukungcwaba umfowethu,” kusho yena.

Okhulumela uMnyango wezokuThuthukiswa koMphakathi KwaZuluNatal, uMnu Mhlaba Memela, uthi kubalulekile ukuba abantu besifazane baphumele obala uma behlukunyezwa, ngoba kugcina kuholele ekutheni babulawe noma kubulawe abasondelene nabo.

“Ungqongqoshe uNkz Nonhlanhla Khoza uhlale ekhuluma lapho ehamba khona ngokuhlukunyezwa kwabantu besifazane. Esikucelayo wukuthi umuntu aphumele obala uma ehlukunyezwa, ngoba zikhona izindawo ezibekelwe ukusiza abasuke bekulesi simo sokuhlukunyezwa,” kusho yena.

Okhulumela amaphoyisa KwaZuluNatal, uCapt Nqobile Gwala, uthe kuvulwe icala lokubulala kanti bekungakaboshwa muntu.

Ubesanda kuthandana nodadewethu kodwa indlela abemhlukumeza ngayo...