Okacothoza uhlanganise izifundazwe
Beziqhuthana amazenze kushukana amaqembu emculweni kacothoza osuzoba minyaka yonke naseGoli
UHLANGANISE iKwaZuluNatal neGauteng ngomncintiswano kacothoza umsakazi wohlelo lomculo wesintu ku-1KZNtv, u-Ugubhu Lwami, uNompumelelo "Helicopter" Ndlovu njengoba amaqembu alo mculo abeshukana, eThokoza, eGoli ngoMgqibelo nayizolo ngeSonto.
UHelicopter, ohlele lo mcimbi ngaphansi kwenkampani, i-Indlovu Production Services, uthi inhloso yokuyisa lo mncintiswano - avame ukuwenza eHammarsdale minyaka yonke - bekuwukuhlanganisa amaqembu aKwaZuluNatal nawaseGauteng.
Uthi nalo mcimbi waseGoli - obekungokokuqala wenzeka - yena nabambisene nabo, okubalwa uMnu Siyabonga Mbatha, bahlose ukuwenza minyaka yonke yize bedonsa kanzima kwazise bawuhlela ngamaphakethe abo.
Phakathi kwamaqembu aKwaZulu-Natal abekhona, kubalwa iNombika Happy Boys, iRoyal Messengers neZulu Messengers Mtuba Messengers kanti awaseGoli bekuyi-Iskhalo se-Africa, i-Inkululeko nePomeroy Gordon Stars.
Njengenjwayelo-ke, kabasalanga oswenka nozime kulo mcimbi. Ekhuluma neLANGA uHelicopter, uthe yize bebefuna ukuhlanganisa iKwaZulu-Natal neGauteng kulo mqhudelwano, kodwa inhloso ngqangi yawo bekuwukuqhuba umkhankaso olwa nokuhlukunyezwa kwabesifazane nezingane njengoba ngoMsombuluko odlule kuqale i-16 Days of Activisim Against Women and Child Abuse.
“Ngokujwayelekile, sike sibe nomncintiswano onjengalona eHammarsdale njalo ngoNtulikazi (July). Ngenxa yempumelelo yale micimbi esijwayele ukuyenza eHammarsdale, amaqembu aseGoli acelile ukuba nawo singawakhohlwa ngoba abantu bayasithanda isicathamiya.
"Sibe sesinquma ukuthi kulo nyaka siwuyise nakhona lo mncintiswano. "Indlela obe yimpulelelo ngayo, sinqume ukuthi kube yinto eqhubekayo, okusho ukuthi njalo uma kuphela uLwezi (November) sizoba nalo mcintiswano eGoli,” kusho yena.
Uthi angakujabulela ukuthola abaxhasi, kwazise kulo mncintiswano bebengenabo.
Amaqembu adle umhlanganiso athole umklomelo ka-R10 000, yisitifiketi nendebe.
Isiyonke imiphumela ihambe kanjena: Emdlalweni wokuqala kunqobe iPomeroy Gordon Stars, isibili sathathwa yiZulu Messengers endaweni yesithathu kwaba yiRoyal Messengers.
Emdlalweni omkhulu kunqobe iNongoma Khethukuthula, kwalandela iNkululeko, Iskhalo se-Africa (Msuthu), iRoyal Messengers neZulu Messengers.
KoNobuhle kunqobe uNomcebo Mchunu, uZinhle Sthole walala isibili kwathi uSnenhlanhla Gazide yena walala isithathu.
Koswenka kunqobe uMhlengi Hlongwane, isibili kwaba nguMdelwa Khanyile, uMseni Khumalo yena walala isithathu. skhom@ilanganews. co.za