Umnotho engcupheni ngeziteleka ezingakhi
KUNOMBONO othi kalukho uhlangothi oluzuzayo ekubeni khona kwesiteleka emsebenzini. Ubuqiniso balo mbono sebubonakele emuva kwesiteleka senkampani yamabhanoyi yombuso, iSouth African Airways (SAA), izisebenzi zayo ezateleka emasontweni amabili edlule ngoba zifuna ukunyuselwa amaholo.
Lezi zisebenzi, ezinye zazo ezingamalungu eNational Union of Metalworkers of South Africa (Numsa) - zazifuna nokuthi iSAA ingaluqali uhlelo lokudiliza ezinye ngenxa yezinkinga zokusweleka kwemali ezihaqe le nkampani.
Sekuwumlando ukuthi isiteleka esidonse izinsuku eziyisishiyagalombili, sigcine siphelile emuva kokuba umqashi nezisebenzi bevumelane ngokwenyuswa kwamaholo ngo-5.9%. Kubuye kwavunyelwana ngokuthi izisebenzi ziyothola enye imali ewu-2.1%, uma ithimba elimele izisebenzi neSAA, liphumelela ukubuyekeza izinkontileka le nkampani eyangena kuzona nezinye izinkampani eminyakeni edlule - lakwazi ukuzimisa lezi zivumelwano ukuze kongeke imali.
Osekuvelile ngemuva kwesiteleka wukuthi siyilimaze kakhulu le nkampani njengoba umnyango wamabhizinisi ombuso owenganyelwe nguNgqongqoshe Pravin Gordhan, usuveze ukuthi iSAA isisesimeni esibi kakhulu semali ngenxa yokulahlekelwa yizigidi zemali engenayo ngenxa yesiteleka, amabhanoyi engabathuthi abagibeli.
Inkece isweleke ngendlela yokuthi izisebenzi kaziwatholanga amaholo azo aphelele ngesonto eledlule, isimo esize salungiswa ngempelasonto lapho zibuye zafakelwa enye imali ebeziyikweletwa.
I-SAA noMnu Gordhan, basole isiteleka ngokwenza isimo ebesivele sisibi, sabheda kakhulu. Sekwenzeke njengoba babexwayisile, ukuthi isiteleka sizoba nomphumela wokuthi abagibeli bezindiza bangayethembi le nkampani ukuthi izokwazi ukuqhubeka nokusebenza, bayihlamuke.
Kumanje kubanjwa kuyayekwa kule nkampani, kakwaziwa ukuthi izokwazi yini ukuqhubeka ibe yibhizinisi noma cha. Yebo, iningi lezakhamizi zakuleli - ngisho nalezo ezisebenzayo - lidonsa kanzima ngenxa yomnotho obuthaka nokungakhuli ngokwanele kwamaholo, okwenza izinyunyana zize zikhethe ukuba kutelekwe ukuphoqa abaqashi ukuba banike amalungu azo imivuzo ayifunayo.
Inkinga wukuthi nazo izinkampani zisobishini ngenxa yesimo esibi somnotho, kazikwazi ukuholela izisebenzi amaholo aphezulu. Kakuwona umqondo ophusile ukuba izinyunyana nezisebenzi bajahe ukuteleka esimeni esinje ngoba lokho kungaba nomthelela wokuthi kwankampani leyo ibe sengcupheni yokuwa, njengoba sesibonile kwenzeka kwaSAA.
Leli zwe lisenkingeni yokusweleka kwemali, bonke abantu abalakhele mababambe iqhaza ekulungiseni isimo somnotho, ngisho nezisebenzi nabaqashi ukuze ngelinye ilanga lizokwazi ukusimama. Maziphele iziteleka ezingakhi, ezibeka izinkampani engcupheni yokushabalala okuba nomphumela wokuba izisebenzi zilahlekelwe okuncane ezinakho.