I-CMA ITHOLE I-GOLD LABEL YE-IAU
ICOMRADES Marathon Association (CMA) ithole i- gold label yeInternational Association of Ultrarunners (IAU) okuyinhlangano ebhekelene namabanga amade emhlabeni.
IComrades ithola le label nje, kuzokuthi ngoMgqibelo kube neIAU 50km eNigeria lapho elakuleli lizokube limelwe khona ngabasubathi abawu-6.
I-CMA ithola le label nje, abasubathi bakuleli basanda kwenza kahle emidlalweni yomhlaba ye-IAU i-50km ne-100km ngokwahlukana.
Umjaho onikezwa le label kusuke kufanele ukuba abadidiyeli bawo baqinisekise ukuthi umzila ukalwa ngumuntu onesitifiketi seWorld Athletics (WA) phambilini obekuyi-International Association of Athletics Federation (IAAF).
Umjaho ukuze uthole i- label yeIAU kuthiwa kufanele ube neminyaka emithathu kuya phezulu kanti abasubathi bawo kufanele babambe iqhaza emijahweni walolu hlobo iminyaka engaphezulu kwemithathu njengoba elakuleli lenze kahle kwi-IAU 50km nakwi100km ngokwahlukana.
USihlalo weCMA uCheryl Winn, utshele abezindaba ukuthi bajabule kakhulu ngokwethenjwa yiIAU. Uthi ubonga bonke abasubathi asebeke babamba iqhaza kulo mjaho, amavolontiya nezikhulu zawo.
IComrades yangonyaka ozayo izokuba ngomhla ka-14 kuNhlangulana (June) isukela eMgungundlovu isongwe eThekwini. Lo mjaho uzokube ugubha iminyaka ewu-95 wasungulwa.
Kuqopheke umlando emjahweni wangonyaka ozayo njengoba kuthathe izinsuku eziwu-7 nje kuphela ukuba kutholakale abasubathi abawu-27 500 abazokuba yingxenye yalo mjaho ozophelela eMoses Mabhida Stadium, eThekwini. I-CMA ithola le label nje, iFNB Durban 10km nayo isanda kuhlabana nge- bronze label yeWA.