IZINHLOLI ZAMAKILABHU E-PSL KWINKANDLA MAYORAL CUP
KUBOSHELWE izinhloli ezahlukene kwiNkandla Mayoral Cup ezokuba ngoMgqibelo womhla ka-21 kwephezulu eNkandla Stadium.
Lo mqhudelwano ophethe isiteki sika-R15 000 kwizingqwele, uzohanjelwa yithimba elihlwayela abadlali iBaroka FC, eleBlack Leopards, uMabhudi Khenyeza wamaZulu FC nabeTM Scouting abaholwa nguTebogo Moloi.
Abazohlulwa kowamanqamu bazothola u-R10 000, kanti abazolala endaweni yesithathu bazonikwa u-R5000.
Le midlalo sekunesikhathi iqalile njengoba kusungulwe iMayoral League edlalwa kumawadi awu-14 akhande umasipala waseNkandla oholwa nguThami Ntuli ( osesithombeni) oyiMeya.
Iwadi ngayinye yabelwe u-R20 000 wokudlalisa iligi. Amakilabhu amabili aqede phezulu kwi- log yewadi ngayinye, ayiswe emidlalweni yokuhlunga, ahlanganiswa namabili agijima kwiSAB
League.
Njengamanje sekusele amane azoshukana kuma- semi final bese kukhishwa ingqwele. Lo mqhudelwano uzophelezelwa ngedili lomculo elibophele inqwaba yabaculi bezinga eliphezulu.
Nawo lo mcimbi obizwa ngeNkandla Music Extravaganza, uzosingathelwa eNkandla Stadium. Kuwona kuboshelwe abaculi okubalwa kubona uKhuzani, iGcokama Elisha, uDladla Mshunqisi, uBabes Wodumo, uTipcee, uQhosha, uMjikijeli, uNjoko, uStayela, uMabhilidi nabanye abaningi kuhlanganisa noDj bendawo. UNtuli uthi ukusungulwa kwemidlalo yamawadi kuyindlela abalekelela ngayo iSafa ezinhlelweni zokuthuthukiswa kwebhola. Uthi balindele ukuthi le midlalo ikhiqize inqwaba yabadlali.
Uthi ukumema izinhloli kuhloswe ngakho ukunika abadlali bendawo ithuba lokuba baveze ikhono labo.