Usencelisa amawele owaxoshwa wuSuthu
Uyacula abuye adlale unobhutshuzwayo
KAKUMGQILAZI ukuncelisa amawele umdlali owaxoshwa ngamaZulu FC osengene endimeni yezomculo abuye agijime kwiSteenberg United eguqiswe yiReal Kings ngo-3-1 kowokuhlunga amakilabhu awu-8 agijima kwiGladAfrica Championship azongena esigabeni sika- last 32 kwiNedbank Cup. Umdlalo wala makilabhu ubungoLwesihlanu ntambama eChatsworth Stadium, eThekwini.
Amagoli eKings avalelwe enethini ngu-Edmore Chirambadare, uLevy Mashiane no-Edward Manqele.
U-Ayabulela Konqobe oseyisitobha seSteenberg, ubegijima oSuthwini kumasizini ambalwa adlule ngaphambi kokukhonjwa indlela. Ngesikhathi exoxa neLANGA ngoLwesihlanu, uveze ukuthi impilo yokucula nokudlala ibhola kayincintisani nhlobo kwazise kokubili uyakuthanda ukukwenza.
Uthi okubalulekile wukusiza ikilabhu kwazise inabadlali abaningi abasebancane. Uthi okumqoka manje wukubhekana neligi njengoba sebekhishiwe kwiNedbank.
“Ngisenalo ithemba lokubuyela kwi-Absa Premiership. Empeleni ngisafisa nokuyodlala phesheya kwezilwandle kwazise neminyaka isangivumela. Uma ithuba lokuya phesheya livela ngizolibamba ngazo zombili. Ngeke nangengozi ngaliyeka nethuba lokubuyela kumaZulu FC uma kungenzeka livele,” kusho uKonqobe.
UJoel “Mpholofitha” Masutha ocija iKings, uzwakalise ukujabula kakhulu ngokunqoba lo mdlalo ezeseka ngokuthi uzobuyisa ukuzethemba kubadlali bakhe.
UMike Lukhubeni ocija iSteenberg, uncome abadlali bakhe ngokudlala kahle. Uthi ukholwa wukuthi kube yinhlanhla enkulu ukuphuma kulo mqhudelwano ukuze bezobhekana kahle nemidlalo yeligi.
KwezeGladAfrica Championship, munye umdlalo ozokuba ngoLwesithathu ozogijinywa yiRichards Bay FC ne-University of Pretoria ngo-15h30 eMhlathuze Sports Complex, eRichards Bay.
Lo mdlalo ubuyiswe yiPSL ngenxa yokuthi iTuks ibinabadlali abebebizelwe kwi-U/23 esanda kuzibekisela indawo kuma-Olympic Games azokuba seJapan ngo-2020.
*
Tshakhuma 2 (3), uThongathi 2 (4); TS Galaxy 1, Cape uMoya 0 ; Swallows 1 (0), Eagles 1 (3); Kings 3, Steenberg 1; Bay FC 1, Ajax 2; Free State 1, TS Sporting 2; Mbombela 1, JDR 0; Cosmos 2, Tuks 1.