UGXEKE ABADLALI BAKHE BEBANJWA NGOMAKOTI BELIGI

UDINWE uyaqhuma uKaitano Tembo ongumqeqeshi weSuperSport United ngesenzo sabadlali bakhe njengoba ebasola ngokuba ngabadayisi.

ISuperSport idedele amaphuzu ekhaya ibambana ngo-1-1 nomakoti beligi, iStellenbosch FC kowe-Absa Premiership ngoMgqibelo ebusuku eLucas Moripe Stadium, e-Atteridgeville.

ISuperSport yiyona evule inkundla ngesikhathi uKudakwashe Mahachi elibeka enethini, kodwa igoli lakhe lacinywa ngelikaWaseem Isaacs.

ISuperSport bekubhekwe ukuba nayo izigwazele ibhece kule kilabhu njengoba ibibuya endukwini ka-4-0 eyithole kwiKaizer Chiefs koweligi ngeledlule.

UTembo obedinwe eqhuma emuva komdlalo, uthe: “La maphuzu sizowakhalela ngelinye ilanga. Besingekho isidingo sokuphisana ngawo. Nakuba singabanga nomdlalo omuhle kodwa bekufanele siwunqobe lo mdlalo.

“Abadlali bami basidayisile lokho ngeke ngikufihle. Kodwa-ke kakusenani kufanele sibheke umdlalo ozayo esizowugijima neHighlands Park.”

USteve Barker ololonga iStellies, uthi ezakhe ziya ngokungena egiyeni.

“Okufanele abantu bakuqonde wukuthi sisanda kunyukela kulesi sigaba, kasikakujwayeli ukudlala phakathi neviki nangezimpelasonto. Kancane kancane izinto zizogcina zihlangene. Okuhle wukuthi nathi siyacoshacosha amaphuzu, kakufani,” kusho uBarker.

IStellenbosch ifike kulesi sigaba ngelikhulu ishodi emuva kokudla ubhedu kwiNational First Division (NFD) ngesizini edlule kanti beyivele icijwa nguBarker ongemusha kulesi sigaba kwazise phambilini wake wayibamba kusona elolonga AmaZulu FC.

IStellies ingenye yamakilabhu ayithemba laseWestern Cape emuva kokuba wonke amadala esagencwa yizembe kulesi sigaba kubalwa i-Ajax Cape Town neSantos.

Lesiya sifundazwe sesimelwe yiCape Town City esungulwe eminyakeni embalwa edlule neStellenbosch.

Okufanele abantu bakuqonde wukuthi sisanda kunyukela kulesi sigaba...