UBALISE NGAMATHUBA NAKUBA ENQOBILE OWE-CELTIC
ULEHLOHONOLO Seema ongumlolongi weBloemfontein Celtic ubalisa ngamathuba ayekwe ngabadlali bakhe yize ezakhe zinqobe iPolokwane City ngo-1-0 koweAbsa Premiership ngoMgqibelo ntambama ePeter Mokaba Stadium, ePolokwane.
Igoli okunqobe ngalo iCeltic livalelwe enethini nguVictor Letsoalo. ICeltic ithele usawoti esilondeni sePolokwane njengoba sekuphele imidlalo ewu-8 ingakaze inqobe.
Kuvela ukuthi iPolokwane kungenzeka iqashe umqeqeshi lingakapheli leli sonto njengoba kubambe uBernard Molekwa obukeka ehluleka. USeema uthi unovalo ngento ezogcina yenziwe ngabadlali bakhe.
“Empeleni kangazi ukuthi kumele ngithini. Ngelinye ilanga laba bafana bazobulalisa umuntu ebhentshini, amelwe yinhliziyo.
Lo mdlalo bekufanele siqede ngawo, sihlohle inqwaba yamagoli kodwa lutho. Le nto abayenzayo ngiyasaba ngempela ngoba izokhipha isidumbu ngelinye ilanga. Kodwa-ke kakusenani ngoba sinqobile kodwa ngeke ngiqambe amanga kangijabulile neze ngendlela esenze ngayo,” kusho uSeema.
UMolekwa usole abadlali bakhe ngokumenzela phansi.
“Lo mdlalo bekufanele siqede ngawo ngesiwombe sokuqala kodwa sayeka inqwaba yamathuba. ICeltic ibingabonwa nhlobo ngesiwombe sokuqala.
“Ibuye ngamandla ngesiwombe sesibili yaze yathola igoli. Kulo mdlalo senzelwe phansi ngabadlali bethu, amaphutha abawenzile yiwona aholele ekutheni sehlulwe,” kusho uMolekwa.
BANKANKANYA eyokusungula umqhudelwano waminyaka yonke ozodlalelwa yiOrlando Pirates nenye ikilabhu yaKwaZulu-Natal kwamathathu agijima kwi-Absa Premiership abaphathi bomasipala wasoKhahlamba, eBergville.
Emasontweni amabili edlule bekuneDrakensberg Extravaganza & Heritage Experience eqale ngomhla ka-21 kuLwezi (November) yasongwa izolo ngeSonto eBergville.
Kulo mcimbi bekuboshelwe izinto ezahlukene kubalwa ezokugijima, imijaho yamabhayisikili, igalofu, imihlangano yokucobelelana ngolwazi kanti usongwe ngedili lomculo.
NgoLwesine ebusuku bekuhlelwe isidlo sakusihlwa lapho bekumenywe khona izifundiswa nabantu abavelele emikhakheni eyahlukene abadabuka kulo masipala othathwa njengophakathi nendawo kumadolobha ayizizinda zomnotho wakuleli okuyiGoli neTheku.
Kulesi sidlo ebesisoKhahlamba Sports Centre, bekubhungwa ngokungabeka izindawo ezingaphansi kwalo masipala ebalazweni, umnotho usimame kuphinde kuvuleke namathuba emisebenzi entsheni.
Ekhuluma kulo mcimbi uKhansela uMlungisi Ndlangisa oyiMeya yasoKhahlamba, uthe: “Siphezu kwezinhlelo zokuqedela kahle inkundla yalapha (eyingxenye yeSports Centre), ifakwe izihlalo zabalandeli ukuze sikwazi ukusingatha kahle amakilabhu amakhulu. Sihlela ukuba nomqhudelwano webhola ozohlelwa ngendlela efanayo neMacufe (yaseBloemfontein).
“Mangikucacise-ke ukuthi ikilabhu yokuqala esesiyihlonzile ukuba idlale lo mqhudelwano yiPirates. Cha, ngeke nje kube yiKaizer Chiefs. Phela iChiefs seyinawo vele umqhudelwano wayo, iMacufe.
“Osekusele nje wukuthi sithole ikilabhu yaKwaZulu-Natal okuyiyona ezodlala nePirates minyaka yonke kulo mqhudelwano.”
Le nkulumo yemeya yelanywe yihlombe elikhulu ezethamelini okwenze noDuma KaNdlovu obengomunye wabaphathi bohlelo waveza ukuthi uyazidayisa kulo masipala ukuba basebenzise amagalelo akhe ekuqinisekiseni ukuthi leli phupho liba yimpumelelo ezeseka ngokuthi ungomunye wabajutshwa ukudweba indlela okuhlelwa ngayo iMacufe Cup.
IMacufe iwumcimbi okuhloswe ngawo ukuthuthukisa iBloemfontein nokuyidayisa ezivakashini kanti iphothulwa ngomdlalo ogijinywa yiBloemfontein Celtic neChiefs minyaka yonke.